BAKI, AzerVoice
İstanbul Böyükşəhər Bələdiyyəsində korrupsiya istintaqı çərçivəsində 97 nəfər həbs edilib, 312 nəfər şübhəli qismində dindirilib.
AzerVoice xəbər verir ki, İstanbul Baş
Prokurorluğu tərəfindən aparılan korrupsiya istintaqı çərçivəsində
İstanbul Böyükşəhər Bələdiyyəsinin sabiq rəhbəri Əkrəm İmamoğlu da
daxil olmaqla 312 nəfər barəsində istintaq tədbirləri görülüb.
Onlardan 97 nəfəri həbs edilib, 206 nəfər isə məhkəmə nəzarəti
altında saxlanılır.
İstintaq, 2023-cü ildə CHP-nin İstanbul qərargahında lentə alınan “pul sayma görüntüləri” ilə başlayıb. İfadə verən şahidlər, bəzi iş adamlarının qanunsuz yolla ödənişə məcbur edildiyini və tender saxtakarlığı vasitəsilə qeyri-qanuni gəlir əldə edildiyini iddia ediblər. Prokurorluq tərəfindən “cinayətkar təşkilat yaratmaq”, “rüşvət alma”, “dələduzluq”, “şəxsi məlumatların qanunsuz əldə olunması” və digər maddələrlə istintaq aparılır.
Xatırladaq ki, Əkrəm İmamoğlu, 2025-ci il martın 23-də vəzifəsindən uzaqlaşdırılıb və “cinayətkar təşkilata rəhbərlik etmək”, “rüşvət alma” və “tender saxtakarlığı” ittihamları ilə həbs edilib. Bundan sonra müxtəlif tarixlərdə keçirilən yeddi əməliyyatda ümumilikdə 303 nəfər saxlanılıb.
İstintaq çərçivəsində bələdiyyəyə bağlı müxtəlif qurumların rəhbərləri və əməkdaşları, o cümlədən bələdiyyə şirkətləri rəhbərləri, mətbuat və reklam sahəsində çalışan şəxslər də saxlanılıb. Həmçinin İmamoğlunun yaxın çevrəsinə daxil olan şəxslər, o cümlədən mühafizəçiləri və şəxsi katibi də istintaqa cəlb edilib.
Cinayət işində adları keçən şəxslər arasında İBB-nin sabiq mətbuat və ictimaiyyətlə əlaqələr rəhbərləri, törəmə şirkətlərin direktorları və bir neçə keçmiş millət vəkili də yer alır. İstintaq çərçivəsində ifadə verərək 39 nəfər azadlığa buraxılıb.
Qeyd edək ki, 2023-cü ildə CHP-nin qərargahında yayılan pul sayma görüntüləri ilə əlaqəli başlanan istintaq çərçivəsində mart ayından bəri aparılan əməliyyatlarda İmamoğlu ilə yanaşı, Beylikdüzü və Böyükçekmece bələdiyyələrinin rəhbərləri və onların müavinləri də daxil olmaqla çox sayda şəxs barəsində istintaq davam edir. Hazırda hüquq-mühafizə orqanları əlavə 9 şübhəlinin tutulması istiqamətində əməliyyat tədbirlərini davam etdirir.
