BAKI,
AzerVoice
Türkiyədə 2025-ci ilin ilk yarısında saatda 4 zəlzələ qeydə
alınıb.
AzerVoice xəbər verir ki, bu ilin
yanvar-iyun aylarında Türkiyədə ümumilikdə 18 min 191 zəlzələ baş
verib.
Bu isə orta hesabla saatda 4, gündə isə 100 yeraltı təkan deməkdir.
Məlumatı Gazi Universitetinin Fəlakətlərin İdarə Edilməsi üzrə
mütəxəssisi, dosent Dr. Bülent Özmen açıqlayıb.
Özmen qeyd edib ki, bu göstərici illik orta rəqəmlərə yaxındır və seysmik aktivliyin artmasında Santorini və Amorgos adaları ətrafında baş verən zəlzələ fırtınaları, eləcə də 23 aprel tarixində İstanbulda baş verən 6,2 bal gücündə zəlzələ əsas rol oynayıb.
Ən çox zəlzələlər Muğla, Malatya, Kütahya, Kahramanmaraş və İstanbulda qeydə alınıb. Bu təkanlar nəticəsində 2 nəfər həyatını itirib, 452 nəfər yaralanıb.
Dr. Özmen xəbərdarlıq edib ki, Marmara bölgəsində, xüsusən də İstanbul yaxınlığında yerləşən Şimali Anadolu Qırığının həm şimal, həm də cənub qolları ciddi risk daşıyır. Gəmlik və Silivri sahillərindəki zəlzələlər bu riski bir daha təsdiqləyib.
Onun sözlərinə görə, zəlzələlərin Konya və Ankara kimi bölgələrdə də aktiv daxili qırılmalar nəticəsində baş verməsi Orta Anadolu bölgəsinin də təhlükədə olduğunu göstərir.
Qeyd edək ki, mütəxəssislər İstanbul və Marmara bölgəsində baş verə biləcək 7 və ya daha yüksək bal gücündə zəlzələnin Kahramanmaraş zəlzələlərindən iki-üç dəfə daha dağıdıcı ola biləcəyi barədə xəbərdarlıq edirlər. Bu səbəbdən, zəlzələ risklərinin azaldılması istiqamətində işlərin sürətləndirilməsi tələb olunur.
