BAKI,
AzerVoice
Anadolu Qartalı-2025 Təlimində tarixi yenilik- Bombardman rolunda
ilk dəfə İHA-lar istifadə edilib.
AzerVoice xəbər verir ki, Türkiyənin Konyada yerləşən 3-cü Əsas Jet Baza Komandanlığında keçirilən “Beynəlxalq Anadolu Qartalı-2025” hərbi təlimində ilk dəfə pilotsuz uçuş aparatları (İHA) birbaşa bombardman missiyasında iştirak edib.
Təlimin ev sahibi olan Türkiyə ilə yanaşı, ABŞ, Azərbaycan, Qətər, Macarıstan, Səudiyyə Ərəbistanı, İordaniya və NATO-nun iştirakı ilə keçirilən manevrlərdə müxtəlif döyüş təyyarələri və taktiki hava vasitələri yer alıb. Təlimi izləyən media nümayəndələrinə açıqlama verən 3-cü Əsas Jet Baza Komandiri general-mayor Mete Kuş bildirib ki, ilk dəfə olaraq bombardman rolunda yalnız İHA-lar – Akıncı-S və ANKA-3 – iştirak edib və bu sistemlər eyni zamanda müdafiə və eskortluq funksiyalarını yerinə yetiriblər.
Təlim çərçivəsində simulyasiya olunmuş əməliyyat şəraitində İHA-ların hədəflərə dəqiq zərbələr endirməsi, qanadlı raket hücumlarının qarşısının alınması, insanlı və insansız hava platformalarının koordinasiyalı iştirakı sınaqdan keçirilib. Kuş bu inkişafı təkcə təlim deyil, gələcəyin müharibəsinə hazırlıq adlandırıb.
Qeyd edək ki, Anadolu Qartalı Təlim Mərkəzi Avropada yeganə, dünyada isə yalnız üç analoji taktik təlim mərkəzindən biridir. Təlimlər 300x400 km ərazini əhatə edən geniş zonada keçirilir və bu il iyunun 23-dən iyulun 4-dək davam edəcək. Anadolu Qartalı təlimləri 2001-ci ildən bəri keçirilir və bu günədək 27 beynəlxalq və 27 milli olmaqla ümumilikdə 54 təlim mərhələsi reallaşdırılıb, 27 minə yaxın sorti uçuş həyata keçirilib.
