BAKI, AzerVoice
Türkiyə Böyük Millət Məclisi (TBMM) İsrailin İrana hücumunu pisləyib.
AzerVoice xəbər verir ki, bu haqqda TBMM qətnamə qəbul edib.
“Biz İsrailin Qəzza xalqına qarşı soyqırımını, bölgədəki sülhə təhlükə yaradan bütün fəaliyyətlərini və İrana qarşı həyata keçirdiyi hücumu kəskin şəkildə qınayırıq” - deyə, qətnamədə bildirilib.
Sənəddə həmçinin beynəlxalq ictimaiyyətə çağırış yer alıb.
“İsrailin təcavüzü qarşısında səssiz qalan bütün beynəlxalq qurumları və hökumətləri beynəlxalq hüquq və diplomatiya çərçivəsində məsuliyyətli davranmağa çağırırıq. Beynəlxalq ictimaiyyətdən İsraili dayandırmaq üçün qətiyyətli və prinsipial mövqe gözləyirik” - deyə, sənəddə qeyd olunub.
Xatırladaq ki, İsral Hərbi Hava Qüvvələri iyunun 13-də İran ərazisinə hava zərbələri endiriblər. Zərbələr nəticəsində çoxlu sayda yüksək səviyyəli hərbçi, o cümlədən İran Silahlı Qüvvələri Baş Qərargah rəisi Məhəmməd Baqeri, İran İslam İnqilabı Keşikçilər Korpusu (SEPAH) baş komandanı Hüseyn Salami, Xatəm Əl-Ənbiya Qərargahının komandanı Qulaməli Rəşid, 6 nüvə alimi və yüksək vəzifəli şəxslər ölüb. İran BMT Təhlükəsizlik Şurasının hadisə ilə əlaqədar fövqəladə iclas keçirməsini istəyib.