BAKI, AzerVoice
Qəzza üçün Türkiyə Diyanət Vəqfi (TDV) tərəfindən 60 min nəfərlik qurban ianə ediləcək.
AzerVoice xəbər verir ki, Türkiyə
Diyanət Vəqfi (TDV) bu il Qurban bayramı münasibətilə Qəzza xalqına
dəstək məqsədilə Misir və Livanda ümumilikdə 7450 qurbanlıq heyvan
kəsəcək.
Bu qurbanların ümumilikdə 60 min nəfərə çatacağı bildirilir.
TDV Xeyriyyə Xidmətləri Direktorunun müavini Mahmud Temelli bildirib ki, heyət artıq Misirdə fəaliyyətə başlayıb. “30 nəfərlik heyətlə Türkiyədən Misirə gəldik. Komandalarımız 4 bölgəyə göndərilib və yerli tərəfdaşlarla əməkdaşlıq edirik. Heyvanları alaraq kəsim məntəqələrinə çatdırırıq”- deyə o bildirib.
Kəsimdən sonra ətin Qəzzaya daşınma prosesi barədə məlumat verən Temelli əlavə edib ki, soyuq zəncir sistemi ilə işləyən yük maşınları ətləri soyuducu anbara daşıyır. Sərhəd qapısı açıldıqdan sonra ət tədricən Qəzza xalqına çatdırılacaq. Hər hansı gecikmə və ya xarab olma riskinə qarşı isə qurban ətlərinin konservləşdirilməsi planlaşdırılır.
Qeyd edək ki, ötən il TDV tərəfindən 5200 qurbanlıq heyvan ehtiyacı olan fələstinlilərə çatdırılıb.
Digər tərəfdən, Prezident Rəcəb Tayyib Ərdoğanın TDV-yə bağışladığı iki qurbanlıq qoç Konyada yerləşən ət kombinatında dualarla kəsilib. TDV Satınalma Mütəxəssisi Köməkçisi Mustafa Eşer bildirib ki, “Prezidentimiz də daxil olmaqla vətəndaşlarımızın etibarnamə ilə verdiyi qurbanlar şəffaf şəkildə və xüsusi nəzarətlə kəsilir”.
