BAKI, AzerVoice, Orxan Qədirzadə

Avstriyanın paytaxtı Vyanada Qəzza zolağında çadır məktəbinin yaradılmasına dəstək məqsədilə xeyriyyə yarmarkası təşkil olunub.

AzerVoice xəbər verir ki, tədbir Vyanada fəaliyyət göstərən humanitar təşkilat Rahma Austria tərəfindən şəhərdə yerləşən mərasim zalında keçirilib. Yarmarkada yüzlərlə insan iştirak edib.

Xeyriyyə aksiyası çərçivəsində Qəzzada çadır məktəbinin açılması üçün ianələrin toplanması nəzərdə tutulub. Bu məqsədlə yarmarkada kitablar simvolik olaraq bir avroya satışa çıxarılıb.

Yarmarka zamanı iştirakçılara türk mətbəxinə aid müxtəlif yeməklər də təqdim olunub.

Tədbirdə iştirak edən avstriyalı yazıçı Hubert Krammer çıxış edərək bu cür humanitar təşəbbüslərin əhəmiyyətinə diqqət çəkib. O, eyni zamanda “Miflərin fövqündə” adlı kitabını təqdim edib. Kitabda sionizm ilə faşist cərəyanlar arasındakı əlaqələr, eləcə də sionistlər tərəfindən təşkil edildiyi iddia edilən kütləvi qırğınların tarixi mövzularına toxunulur.

Yarmarka çərçivəsində yalnız maliyyə vəsaiti deyil, həmçinin geyim və yorğanlar da ianə edilib. Toplanan bu humanitar yardımların isə Bosniya və Herseqovinada ehtiyac sahiblərinə çatdırılması planlaşdırılır.