BAKI, AzerVoice

Bəlkə Amerikaya gedib Trampla üz-üzə görüşə bilərəm.

AzerVoice xəbər verir ki, Türkiyə Prezidenti Rəcəb Tayyib Ərdoğan Macarıstana səfəri zamanı təyyarədə jurnalistlərin gündəmdə olan məsələlərlə bağlı suallarını cavablandırıb. O, ABŞ-da nəşr olunan “Newsweek” jurnalında barəsində yayımlanan məqaləyə münasibət bildirib.

“Newsweek” jurnalında “Ərdoğan dünyanın ən güclü adamlarından biridir və Trampın müttəfiqidir” başlıqlı məqalənin dərc olunduğunu xatırladan jurnalistlərin sualına cavab verən Prezident bildirib ki, bu cür qiymətləndirmələr Türkiyənin beynəlxalq arenada artan nüfuzunu əks etdirir.

“Türkiyə gücləndikcə onun beynəlxalq təsir imkanları da artır. Bu, ölkəmizin son 23 ildə qazandığı sabitliyin nəticəsidir. Həm Tramp, həm də digər dünya liderləri ilə münasibətlərimiz möhkəm və səmimidir. Bəlkə Amerikaya səfər edə bilərəm. Düşünürəm ki, orada cənab Trampla üz-üzə görüşmək şansımız olacaq”, – deyə Ərdoğan bildirib.

Qeyd edək ki, Prezident Rəcəb Tayyib Ərdoğan son olaraq 2025-ci il mayın 21-də Macarıstanın paytaxtı Budapeştə səfər edib. Bu səfər çərçivəsində o, Türk Dövlətləri Təşkilatının Dövlət Başçıları Şurasının qeyri-rəsmi iclasında iştirak edib.

Onu da qeyd edək ki, Ərdoğan və ABŞ Prezidenti Donald Tramp son dəfə 2025-ci il mayın 5-də telefon danışığı aparıblar. Bu danışıqda onlar Rusiya-Ukrayna müharibəsinin sonlandırılması, Suriya və Qəzzadakı vəziyyətlər kimi məsələləri müzakirə ediblər.