BAKI, AzerVoice

ABŞ Dövlət Departamenti Türkiyəyə raket satışına icazə verdiyini açıqlayıb. Satılacaq sursatlara orta və qısa mənzilli müasir havadan-havaya raketlər daxildir.

AzerVoice xəbər verir ki, ABŞ administrasiyası Türkiyəyə dəyəri 300 milyon dollardan çox olan sursatın satılacağını bəyan edib.

ABŞ Dövlət Departamentinin Siyasi və Hərbi İşlər Bürosu Türkiyəyə havadan-havaya raketlərin satışına rəsmi şəkildə razılıq verildiyini bildirib. Açıqlamada qeyd olunub ki, bu satış çərçivəsində Türkiyəyə müasir orta mənzilli havadan-havaya raketlər, qısa mənzilli raketlər, eləcə də bu sistemlərlə bağlı logistik və proqram təminatı dəstəyi təqdim olunacaq.

Həmçinin ABŞ Konqresinin də satışla bağlı məlumatlandırıldığı bildirilib.

Açıqlamada “Bu satış, Avropada siyasi və iqtisadi sabitlik üçün güc olmağa davam edən NATO müttəfiqinin təhlükəsizliyini artıracaq” ifadəsinə yer verilib.

ABŞ Müdafiə Nazirliyi də satışın Türkiyəyə kritik hava hücumundan müdafiə qabiliyyəti qazandıracağını qeyd edib. Havadan-havaya raketlərin, xüsusilə F-16-lar başda olmaqla müxtəlif hava əməliyyatlarında istifadə edilə biləcəyi vurğulanıb.