BAKI,AzerVoice

ABŞ-da Fələstinə dəstək verdiyi üçün saxlanılan Tufts Universitetinin doktorantı Rumeysa Öztürkün səhhətinin Luizianadakı ağır saxlanma şəraitində ciddi təhlükə altında olduğu bildirilib.

AzerVoice xəbər verir ki, Öztürkün vəkilləri müvəkkillərinin Vermont ştatına köçürülməsinin təxirə salınmaması üçün apellyasiya məhkəməsinə müraciət edəcəklərini açıqlayıb.

23 qadınla birlikdə izdihamlı və havalandırması qeyri-kafi bir otaqda saxlanılan Öztürkün tez-tez astma böhranları keçirdiyi və bu böhranların getdikcə ağırlaşdığı vurğulanıb. Əvvəllər 5-15 dəqiqə davam edən astma tutmaları indi 45 dəqiqəyə qədər uzanır. Vəkillər türk tələbənin təxminən altı həftədir qanunsuz və səhhətini təhlükəyə atan şəraitdə saxlanıldığını bildirib.

Açıqlamada Öztürkün həşərat və gəmirici nəcislərinə məruz qaldığı, təmiz havaya demək olar ki, çıxa bilmədiyi, tibbi müdaxilələrin gecikdirildiyi və səhiyyə personalının laqeyd münasibət göstərdiyi qeyd edilib.

Massaçusetsdəki federal hakim Öztürkün hüquqi mübarizəsinin Luiziana əvəzinə Vermontda davam etməli olduğuna qərar versə də, Vermontdakı digər bir hakim onun 1 may tarixinə qədər Vermontdakı müəssisəyə köçürülməsini əmr edib. Lakin ABŞ hökuməti 24 aprel tarixində bu qərara etiraz edib.

Vəkillər Öztürkün səhhətinin pisləşməsinin qarşısını almaq üçün təcili tədbir görülməsini tələb edir.

Qeyd edək ki, Tufts Universitetində doktorantura təhsili alan Rümeysa Öztürk 25 martda iftara gedərkən, maskalı 6 Göç və ICE əməkdaşı tərəfindən saxlanılıb. O, əvvəlcə Vermont ştatına, daha sonra isə Luizianadakı mərkəzə köçürülüb.