BAKI, AzerVoice
Silivridəki 6,2 bal gücündə zəlzələ ciddi dağıntıya səbəb olmayıb.
AzerVoice xəbər verir ki, Türkiyənin Fövqəladə Halların İdarə Olunması Agentliyi (AFAD) 23 aprel 2025-ci ildə Mərmərə dənizində, Silivri sahillərində baş verən 6,2 bal gücündə zəlzələ ilə bağlı ətraflı hesabat yayımlayıb.
Hesabatda bildirilir ki, zəlzələ episentrindən 300 kilometr radiusda yerləşən əyalətlərdə mülayim intensivliklə hiss olunub. Silivridən təxminən 24 kilometr uzaqlıqda baş verən təkanlar İstanbulun cənub sahilində 5 bal gücündə aşağı sürətlənmələrlə qeydə alınıb.
Qeyd edək ki, uzun müddətdir aparılan riskin azaldılması tədbirləri nəticəsində zəlzələ heç bir can itkisinə və struktur ziyana səbəb olmayıb. Hadisədən sonra indiyədək 291 afterşok baş verib, onlardan yalnız 8-i 4 və daha yüksək magnitudada olub.
AFAD zəlzələ ilə bağlı enerji analizini də təqdim edib. Belə ki, bu zəlzələ nəticəsində buraxılan enerji 30 kiloton TNT ekvivalentində qiymətləndirilib. Bu göstərici, 2019-cu ilin sentyabrında eyni bölgədə baş verən 5,8 bal gücündə zəlzələnin yaydığı enerjidən təxminən 4 dəfə çoxdur.
Zəlzələ fəaliyyətinin yaxın bir neçə həftə ərzində səngiməsi gözlənilir.
