BAKI,AzerVoice
Türkiyənin xarici işlər naziri Hakan Fidan, Fransanın xarici işlər naziri Jean-Noel Barrot ilə ikitərəfli və regional məsələləri müzakirə edib.
AzerVoice xəbər verir ki, Fidan və Barrot dünən Parisdə ikitərəfli və regional məsələləri geniş şəkildə müzakirə ediblər.
Fidan, görüşdə, Avropanın yeni təhlükəsizlik memarlığının formalaşmasında Avropa İttifaqına (Aİ) üzv olmayan ölkələrlə koordinasiyanın artırılmasının vacibliyini vurğulayaraq, Türkiyə-Aİ münasibətlərindəki süni maneələrin aradan qaldırılmasını və Aİ-nin bu istiqamətdə konkret addımlar atmasını gözlədiyini bildirib.
Nazir Fidan, Rusiya-Ukrayna müharibəsinin sona çatdırılması istiqamətində diplomatik səylərin Türkiyə tərəfindən dəstəkləndiyini bildirərək, bu prosesdə bütün NATO müttəfiqlərinin sıx əməkdaşlıq etməsinin vacibliyini vurğulayıb. Fidan, mümkün bir həllin qalıcı ola bilməsi üçün müharibə edən hər iki tərəfin razılığının lazım olduğunu qeyd edib.
Fidan, görüşdə, Suriyadakı yeni idarəetmə ilə əlaqələrin artırılmasının və bu istiqamətdə sanksiyaların tamamilə aradan qaldırılmasının ölkədə sabitlik və əmin-amanlığın təmin edilməsi üçün vacib olduğunu diqqətə çatdırıb.
Müdafiə sənayesi sahəsində əməkdaşlıq üzrə Türkiyənin gözləntilərini həmkarına bildirən Fidan, PKK/YPG terror təşkilatı ilə mübarizənin əhəmiyyətini vurğulayıb.
Fidan, Suriya şimalındakı həbsxanalar və düşərgələrdəki İŞİD-ə mənsub xarici terrorçuların öz ölkələrinə geri dönmələrinin lazım olduğunu qeyd edib.
İsrailin artan hücumlarının regional sabitliyi poza biləcəyini qeyd edən Fidan, Türkiyənin Fələstin xalqının doğma yurdlarından zorla köçürülməsinə qarşı olduğunu bir daha vurğulayıb.
Fidan, Ərəb Liqasının qəbul etdiyi Qəzza Planına dəstəyini təkrarlayaraq, İsrailin Qəzzəyə humanitar yardım axınını dayandırmasının humanitar böhranın daha da dərinləşməsinə səbəb olduğunu göstərib. Nazir Fidan, humanitar yardımların fasiləsiz şəkildə Qəzzəyə çatdırılmasının həyati əhəmiyyət kəsb etdiyini bildirib.
Barrot və Fidanın görüşündə, Qafqazda sülh və sabitliyin təmin edilməsi istiqamətindəki səylər də müzakirə olunub.