BAKI, AzerVoice

Türkiyə Böyük Millət Məclisinin (TBMM) sədri Numan Kurtulmuş, rəsmi səfər üçün Ankarada olan Rusiya Federasiya Şurasının sədri Valentina Matviyenko ilə görüşüb.

AzerVoice xəbər verir ki,görüş zamanı tərəflər Türkiyə-Rusiya münasibətləri, regional və qlobal məsələlər barədə müzakirələr aparıb. Kurtulmuş, iki ölkə arasında strateji əməkdaşlığın uzun müddətdir davam etdiyini və ticarət həcminin 100 milyard dollara çatdırılmasının əsas hədəflərindən biri olduğunu vurğulayıb.

Rusiya-Ukrayna Münaqişəsi və Türkiyənin Rolu
Kurtulmuş bildirib ki, Türkiyə Rusiya və Ukrayna arasında müharibənin ilk günündən bəri sülh yolunu dəstəkləyib. "Bu müharibə təkcə iki ölkə arasında deyil, həm də Rusiya ilə bütövlükdə Qərb arasında potensial qarşıdurmaya çevrilib. Türkiyə, hər iki tərəflə danışa bilən ölkə kimi müzakirələrin davam etdirilməsinə və sülh yolunun açıq qalmasına böyük əhəmiyyət verir."-deyə o bildirib.

Suriya və Regional Sabitlik
Kurtulmuş, Suriyada illərdir davam edən münaqişəyə toxunaraq, Türkiyənin bu məsələdə üç əsas gözləntisinin olduğunu bildirib: “Suriya ərazi bütövlüyünün qorunması,Bütün qrupların təmsil olunduğu inklüziv siyasi sistemin qurulması və sonuncu da İŞİD, PYD/YPG və digər terror qruplaşmalarının tamamilə ləğvi”- deyə o qeyd edib.

O, Rusiyanın Suriyanın yenidən qurulması və şəhərlərin bərpası prosesinə töhfə verəcəyinə ümid etdiyini qeyd edib.

Fələstin məsələsi və İsrailin təcavüzü
Kurtulmuş, İsrailin Qəzzada və İordan çayının qərb sahilində həyata keçirdiyi hücumları "barbarlıq və soyqırım siyasəti" adlandırıb.

"Fələstin tamamilə fələstinlilərə məxsusdur, Qəzzə isə sonuna qədər Qəzzəlilərin torpağı olaraq qalacaq."İki dövlətli həll yeganə çıxış yoludur və Rusiyanın bu həlli dəstəkləməsi bizi məmnun edir.”-deyə o bildirib.