BAKI, AzerVoice, Nailə Babazadə

2025-ci ilin yanvar-avqust aylarında Türkiyədə 654 min 413 yeni minik avtomobili satılıb. Avtomobil bazarında ən çox satılan marka Renault, ən çox satılan model isə Renault Clio olub.

AzerVoice xəbər verir ki, bu ilin ilk 8 ayında avtomobil və yüngül ticari nəqliyyat vasitələrinin satışları ötən ilin eyni dövrü ilə müqayisədə 7,24% artaraq 817 min 345 ədəd təşkil edib.

Minik avtomobillərinin satışı 8,05% artaraq 654 min 413 ədədə, yüngül ticari nəqliyyat vasitələrinin satışı isə 4,1% artaraq 162 min 932 ədədə yüksəlib.

Marka üzrə satışlarda Renault liderliyini qoruyub

2024-cü ilin ilk 8 ayında Renault markası 74 min 139 ədəd avtomobil sataraq bazarda 11,3%-lik payla lider olub.İkinci yerdə Volkswagen (47 min 645 ədəd), üçüncü yerdə isə Toyota (47 min 264 ədəd) qərarlaşıb. Fiat (46 min 424), Hyundai (40 min 907) və Peugeot (37 min 475) satış rəqəmləri ilə ilk altılıqda yer alıb.
Model üzrə Renault Clio birinci oldu

Model üzrə baxıldığında, ən çox satılan avtomobil Renault Clio (30 min 444 ədəd) olub.İkinci sırada Tesla Model Y (25 min 756 ədəd), üçüncü yerdə isə Renault Megane Sedan (23 min 46 ədəd) qərarlaşıb. Togg T10X (21 min 70 ədəd) və BYD Seal U (18 min 493 ədəd) də ilk beşlikdə yer alıb.

Ən çox satılan kuzov növü: SUV

Avtomobillər gövdə tipinə görə təhlil edildikdə ən çox satılan kuzov tipi SUV avtomobillər olub.Bu seqmentdə 410 min 891 satışla ümumi bazarın 62,8%-ni təşkil edib. SUV-ları sedanlar (22,1% – 144 min 878 satış) və hetçbeklər (14,2% – 92 min 716 satış) izləyib.

Yanacaq növünə görə baxıldığında:

• Benzinli avtomobillər: 304 min 618 satış (46,5%)

• Hibrid avtomobillər: 172 min 366 satış (26,3%)

• Elektrikli avtomobillər: 120 min 857 satış (18,5%)

• Dizel avtomobillər: 52 min 253 satış (8%)

• Otogazlı avtomobillər: 4 min 319 satış (0,7%)