Bakı, AzerVoice
Qırğızıstanın Özbəkistandakı səfiri Düyşönkul Çotonov Özbəkistanın Məktəbəqədər və Məktəb Təhsili naziri Xilola Umarova ilə görüşüb.
AzerVoice xəbər verir ki, görüş zamanı gənc nəslin təhsili sahəsində əməkdaşlığın prioritet istiqamətləri müzakirə olunub.
Tərəflər məktəbəqədər və məktəb təhsili sistemləri arasında qarşılıqlı fəaliyyətin inkişafı ilə bağlı məsələləri müzakirə ediblər. Xüsusilə beynəlxalq olimpiadalara şagirdlərin hazırlanması metodlarının təkmilləşdirilməsi, psixoloji dəstəyin təşkili və istedadlı uşaqlarla iş təcrübəsinin paylaşılması diqqət mərkəzində olub.
Görüşdə həmçinin birgə təlim-məşq toplantılarının təşkili, müəllimlərin ixtisasartırma proqramlarında iştirakı və təhsil proqramları üzrə təcrübə mübadiləsi məsələləri də gündəmə gətirilib.
Görüşün sonunda tərəflər birgə layihələr vasitəsilə təhsilin keyfiyyətini artırmaq və gənc nəslin imkanlarını genişləndirmək barədə razılığa gəliblər.
Qeyd edək ki, hazırda Özbəkistanda Qırğız dilində tədris aparılan 51 ümumtəhsil məktəbi fəaliyyət göstərir. Bu məktəblərdə 8,5 mindən çox şagird təhsil alır.
