BAKI, AzerVoice, Nailə Babazadə
Fənərbaxça, UEFA Avropa Liqasının qrup mərhələsindəki ilk oyununda bu gün Xorvatiyada Dinamo Zaqrebin qonağı olacaq.
Maksimir Stadionunda baş tutacaq qarşılaşmanı fransız hakim Jerom Brizar idarə edəcək. Görüş Bakı vaxtı ilə saat 23:00-da TRT 1-də canlı yayımlanacaq.
Super Liqada son iki oyunundan heç-heçə ilə ayrılan Fənərbaxça, bu oyunda uğurlu nəticə əldə etməyə çalışacaq. Komandanın baş məşqçisi Domeniko Tedesko qarşılaşma öncəsi qələbəyə fokuslandıqlarını bildirib.
Dinamo Zaqreb isə Xorvatiya çempionatında mövsümə yaxşı start verib – 7 oyunda 5 qələbə, 1 heç-heçə və 1 məğlubiyyətlə turnir cədvəlinə başçılıq edir.
Avropa yolunda çətin rəqiblər
Fənərbaxça bu mövsüm avrokuboklara UEFA Çempionlar Liqasının 3-cü təsnifat mərhələsindən başlayıb və Hollandiyanın Feyenoord klubunu mübarizədən kənarlaşdırıb. Ardınca pley-offda Portuqaliyanın Benfika komandasına uduzaraq Avropa Liqasında mübarizəni davam etdirmək hüququ qazanıb.
Dinamo ilə 3-cü qarşılaşma
Fənərbaxça ilə Dinamo Zaqreb indiyədək 2 dəfə UEFA Avropa Liqasında qarşılaşıb. 2018–2019 mövsümündə Zaqrebdə baş tutan oyunu ev sahibləri 4:1 hesabı ilə qazanmış, İstanbulda isə 0:0 bərabərlik qeydə alınmışdı.
Həmin mövsümdə Dinamo Zaqreb qrupu lider, Fənərbaxça isə ikinci yerdə tamamlamışdı.
Avropada 291-ci sınaq
Bu, Fənərbaxçanın avrokuboklarda 291-ci oyunu olacaq. İndiyədək 290 matçda 114 qələbə, 114 məğlubiyyət və 62 heç-heçə qeydə alan İstanbul təmsilçisi, 397 qol vurub, 412 qol buraxıb.
