BAKI,AzerVoice, Fərid Mikayılov
Real Madrid braziliyalı ulduz Vinisius Juniorla yeni müqavilə danışıqlarında mövqeyini dəyişməyəcəyini açıqlayıb.
AzerVoice xəbər verir ki, klub rəhbərliyi futbolçunun ciddi maaş artımı tələbini qəbul etmir, bu isə oyunçunun gələcəyi ilə bağlı qeyri-müəyyənliyi artırır.
Yeni baş məşqçi Xabi Alonso Vinisiusun statusuna fərqli yanaşır. O, braziliyalını bu mövsüm artıq iki oyunda ehtiyatda saxlayıb və hər görüşdə əsas heyətə zəmanət vermir. Vinisius isə bu qərarlardan narazılığını klub prezidenti Florentino Perezə çatdırıb.
Vinisiusun meneceri Federiko Pena həftənin əvvəlində klub rəhbərliyi ilə görüşərək müqavilə məsələsini müzakirə edib. 25 yaşlı hücumçunun hazırkı müqaviləsi daha iki mövsüm qüvvədə olsa da, altı ay əvvəl yeni razılaşma üzərində iş aparılırdı. Lakin Vinisiusun yüksək maaş tələbləri səbəbindən proses dayandırılıb və menecerə klubun son təklifini dəyişməyəcəyi bildirilib.
Vinisius 2024-cü ildə Səudiyyə Ərəbistanına transferlə bağlı iddialarla gündəmə gəlmişdi. Buna baxmayaraq, futbolçu Real Madriddə qalmaq istədiyini vurğulayıb. Əgər gələn yay yeni müqavilə imzalanmasa, braziliyalı ulduz alternativ variantları dəyərləndirə bilər.
La Liqada mövsümə uğurlu başlayan Real Madriddə Vinisius hələlik 2 qol vurub, 2 məhsuldar ötürmə edib. Lakin Alonso tərəfindən Real Sosiedad və Marsel ilə oyunlarda ehtiyatda saxlanılması futbolçunun gələcəyi ilə bağlı suallar doğurub.
