BAKI,AzerVoice
Suriya Müdafiə Nazirliyi bazar günü ölkənin qərb sahilində yerləşən Lazkiyə və Tartus şəhərlərinin mərkəzlərinə zirehli texnika və hərbi maşınlarla dəstəklənən ordu bölmələrinin yeridildiyini açıqlayıb. AzerVoice xəbər verir ki, bu addım etiraz aksiyaları zamanı təhlükəsizlik qüvvələrinə və mülki şəxslərə qarşı silahlı hücumlardan sonra atılıb.
Suriya dövlət televiziyasının Müdafiə Nazirliyinin İnformasiya və Kommunikasiya İdarəsinə istinadən verdiyi məlumata görə, hərbi bölmələrin yerləşdirilməsi qərarı “qanundankənar qruplar tərəfindən əhali və təhlükəsizlik qüvvələrinə qarşı hücumların artması” fonunda qəbul edilib. Bildirilib ki, bölgədəki qüvvələrin əsas vəzifəsi “daxili təhlükəsizlik qüvvələri ilə əməkdaşlıq şəraitində asayişi təmin etmək və sabitliyi bərpa etməkdir”.
Suriya KİV-lərinin məlumatına əsasən, keçmiş rejimin qalıqları ilə əlaqəli silahlı şəxslərin açdığı atəş nəticəsində Lazkiyə və Tartusda üç nəfər həlak olub, 48 nəfər yaralanıb. Rəsmi televiziya həmçinin Lazkiyə şəhərində etirazların mühafizəsi zamanı təhlükəsizlik qüvvələrinin bir əməkdaşının öldüyünü, digərlərinin isə yaralandığını bildirib.
Daha əvvəl Lazkiyə vilayətinin daxili təhlükəsizlik rəhbəri, briqada generalı Əbdüləziz əl-Əhməd bəyan etmişdi ki, etiraz aksiyaları zamanı Lazkiyə və Cəblə şəhərlərində devrilmiş rejimin qalıqlarına bağlı “terrorçu ünsürlər” daxili təhlükəsizlik qüvvələrinə hücum ediblər. Onun sözlərinə görə, hücumlar nəticəsində xüsusi təyinatlı bölmələrə və polisə məxsus nəqliyyat vasitələrinə ziyan dəyib.
Əl-Əhməd bildirib ki, Lazkiyədə Əz-Zəhri dairəsində və Cəblədə Milli Xəstəxana dairəsində etirazlar zamanı silahlı və maskalı şəxslər müşahidə olunub. Onların “Səraiya Dirə əs-Sahil” və “Səraiya əl-Cavad” adlı terrorçu hüceyrələrlə əlaqəli olduğu, bu qrupların M1 avtomagistralında partlayıcı qurğuların yerləşdirilməsi və yerində edamlarla məşğul olduqları qeyd edilib.
Suriya Daxili İşlər Nazirliyi daha əvvəl Cəblə kənd ərazisində “Səraiya əl-Cavad” hüceyrəsinin üzvlərindən birinin saxlanıldığını açıqlamışdı. Rəsmi bəyanatda bildirilir ki, saxlanılan şəxs — Basil İsa Əli Cəmahiri — qətllərin təşkili, partlayıcı qurğuların hazırlanması, daxili təhlükəsizlik qüvvələri və Suriya Ərəb Ordusuna məxsus mövqelərə hücumlar, eləcə də Yeni il tədbirlərinə qarşı terror aktlarının planlaşdırılmasında iştirak edib.
Əməliyyat zamanı partlayıcı maddələr, avtomatik silahlar, müxtəlif sursatlar və hərbi geyimlər müsadirə olunub. Rəsmilər bildiriblər ki, keçmiş rejimlə əlaqəli silahlı hüceyrələrin tam şəkildə zərərsizləşdirilməsi istiqamətində əməliyyatlar davam etdirilir. Məqsəd mülki əhalinin qorunması və Suriyanın bütün ərazisində təhlükəsizlik və sabitliyin təmin olunmasıdır.