BAKI, AzerVoice, Səməd Əyyubov
ABŞ MLS liqasının müntəzəm çempionatı çərçivəsində keçirilən oyunda “Dallas” öz meydanında “Los-Anceles”lə 1:1 hesablı heç-heçə edib.
AzerVoice xəbər verir ki, “Los-Anceles”in heyətində debüt qolunu cənubi koreyalı hücumçu Son Hın Min vurub.
Qeyd edək ki, futbolçunun bu kluba transferi avqustun 6-da rəsmiləşmişdi. O, 2015-ci ildən “Tottenhem”də çıxış edirdi. Keçən mövsüm London təmsilçisi ilə Avropa Liqasının qalibi olan Son, ümumilikdə 454 oyunda 173 qol vurub və klub tarixində ən məhsuldar futbolçular arasında dördüncü yerdə qərarlaşıb. 2021/22 mövsümündə isə o, Məhəmməd Salah ilə birlikdə İngiltərə Premyer Liqasının bombardirlər siyahısında birinci yeri bölüşmüşdü.
Turnir cədvəlinə gəldikdə isə, “Los-Anceles” 41 xalla Qərb konfransında dördüncü pillədə yer alır. “Dallas” isə 30 xalla 11-ci yerdə qərarlaşıb.
Növbəti turda “Los-Anceles” sentyabrın 1-nə keçən gecə öz meydanında “San-Dieqo”nu qəbul edəcək. “Dallas” isə sentyabrın 7-nə keçən gecə səfərdə “Sent-Luis”lə qarşılaşacaq.
