BAKI, AzerVoice, Nailə Babazadə

Çelsi klubu bu mövsüm Yuventusda parlaq çıxışı ilə diqqət çəkən Türkiyə millisinin gənc hücumçusu Kənan Yıldızı transfer etmək üçün ciddi səylər göstərir. London təmsilçisinin transferi reallaşdırmaq məqsədilə 90 milyon avroluq təklif üzərində işlədiyi bildirilir.

AzerVoice xəbər verir ki, TEAMtalk-ın məlumatına görə, Çelsi bu keçid üçün ardıcıl şəkildə fəaliyyət göstərir – klub nümayəndələri Yuventusun oyunlarını izləyir, futbolçunun menecerləri ilə danışıqlar aparır və “çox həyəcanverici bir təklif” kimi qiymətləndirilən təklif hazırlayır.

İtaliya mətbuatının yazdığına görə, Yuventus yeni müqavilə barədə Kənanla razılığa gələ bilməsə, Çelsi transfer yarışında əsas favoritə çevriləcək. İngiltərə klubu Yıldızı hücumçu Cole Palmer üçün ideal tərəfdaş kimi görür. Komanda dinamik, yaradıcı və hücum xəttinin bütün mövqelərində oynaya bilən futbolçu axtarır.

Keçən yay Çelsinin 70 milyon avroluq təklifini rədd edən Yuventusun mövqeyinə əsasən, 90 milyon avro bu transfer üçün minimum məbləğ hesab olunur.

Kənan Yıldız cari mövsümdə Yuventusun heyətində 16 oyuna çıxaraq 6 qol və 5 məhsuldar ötürmə ilə fərqlənib. O, “Udineze” ilə görüşdə 3:1 hesablı qələbəni təmin edən penalti zərbəsini də dəqiq yerinə yetirib. Gənc futbolçunun çoxşaxəli oyunu və soyuqqanlılığı onu Avropanın ən çox izlənilən gənc istedadlarından birinə çevirib. Onun bazar dəyərinin artıq 100 milyon avroya yaxınlaşdığı qeyd olunur.

Lakin Kənanla maraqlanan təkcə Çelsi deyil. Real Madrid futbolçunun keçmiş komanda yoldaşı Dean Huijsen ilə yenidən birləşmə ehtimalı və Madrid klubunda oynamaq istəyi səbəbindən əsas rəqiblərdən biri kimi göstərilir. Bundan başqa, Arsenal, Mançester Yunayted və Liverpul klublarının da 2026-cı ilin yayında təkliflərini təqdim etməyə hazırlaşdığı bildirilir.

Yuventus Kənan Yıldızı komandada saxlamaq üçün hərəkətə keçib. Turin təmsilçisi gənc futbolçuya 2030-cu ilə qədər illik 5,5 milyon avro maaş təklif edib və yaxın günlərdə oyunçunun ailəsi ilə görüş keçirib.

Kənan Yıldız daha əvvəl verdiyi müsahibələrdə Yuventusa sevgisini ifadə edərək klubda “həyatının sonuna qədər qalmaq istədiyini” demişdi. Lakin danışıqların uzanması halında Çelsinin maliyyə gücü və transferdəki fəallığı həlledici rol oynaya bilər.