BAKI, AzerVoice

İspaniyanın "Real Madrid" klubunun, "Bayer Leverkuzen"də çıxış edən Ekvadorlu müdafiəçi Piero İnkapiye ilə maraqlandığı iddia edilib.

AzerVoice-un məlumatına görə, bazar dəyəri təxminən 50 milyon avro olan 23 yaşlı futbolçu, "Real Madrid"in transfer radarına daxil olub və kluba təklif edilib.

Piero İnkapiyenin ən böyük üstünlüklərindən biri, Xabi Alonsonun sisteminə yaxşı bələd olmasıdır. "Bayer Leverkuzen"də keçirdiyi müddət ərzində Alonso ilə çalışan Ekvadorlu futbolçu, üçlü müdafiənin sol tərəfində sabit və inamlı oyun nümayiş etdirib. Bu isə onu Real Madrid üçün cəlbedici bir seçimə çevirir.

İnkapieyə "Atletiko Madrid" və "Çelsi" kimi klubların da maraq göstərdiyi vurğulanıb. Lakin hazırda "Real Madrid"in bu transfer üçün konkret addım atmadığı və yay transfer dövründə müdafiə xəttinə yenidən böyük məbləğ xərcləmək niyyətində olmadığı bildirilib.

Qeyd edək ki, "Real Madrid"də Eder Militao və David Alabanın uzunmüddətli zədələnmələrindən sonra tam formada olub-olmayacağı sual altındadır. Antonio Rüdiger isə yaxın zamanda cərrahiyyə əməliyyatı keçirdiyi və dizində xroniki artrit problemi yaşadığı üçün risk daşıyır. Raul Asensionun Klublararası Dünya Çempionatında performansı isə texniki heyətdə əlavə suallar yaradıb.

Bu səbəbdən, "Real Madrid"in müdafiə xəttindəki problem hələ də ciddi narahatlıq mənbəyidir.