BAKI, AzerVoice
Səudiyyə Ərəbistanının klubu Əl-Nəsr portuqaliyalı mütəxəssis Jorje Jesus baş məşqçi təyin edildiyini rəsmi şəkildə elan edib.
AzerVoice xəbər verir ki, klubun mətbuat xidməti sosial media hesablarında yayımladığı açıqlamada 69 yaşlı təcrübəli mütəxəssislə bir illik müqavilə imzalandığı bildirilib.
Jesus bu vəzifədə italiyalı məşhur mütəxəssis Stefano Piolini əvəzləyib. Əl-Nəsr 25 iyun tarixində Pioli ilə yollarını ayıraraq, ona xidmətlərinə görə təşəkkür edib və gələcək karyerasında uğurlar arzulayıb. Piolinin rəhbərliyi altında komanda 44 oyunda 27 qələbə qazanıb, 7 heç-heçə edib və 10 dəfə məğlub olub. Hazırda o, İtaliyanın Fiorentina klubunun baş məşqçisidir.
Portuqaliyanın ən təcrübəli məşqçilərindən sayılan Jorje Jesus futbol karyerasına 1980-ci illərdə aşağı liqalarda başlayıb. Onun parlaq yüksəlişi 2009-cu ildə Benfika klubuna keçidi ilə başladı. O, bu komandaya 3 dəfə Portuqaliya çempionluğu (2010, 2014, 2015), bir dəfə Portuqaliya Kuboku və 5 dəfə Liqa Kuboku qazandırdı. Jesusun topa sahib olmağa əsaslanan hücum futbolu Benfikanı ölkənin dominant klubuna çevirdi.
2015-ci ildə Sportinqin baş məşqçisi olan Jesus burada da uğurlar qazandı və Superkuboku əldə etdi. Daha sonra Portuqaliyadan kənarda da fəaliyyət göstərərək Səudiyyənin Əl-Hilal (2019-cu il çempionluğu) və Braziliyanın Flamenqo klublarına rəhbərlik etdi. Xüsusilə Flamenqoda 2019–2020-ci illərdə qazandığı Braziliya çempionluğu, Libertadores Kuboku və digər titullar onu Cənubi Amerikada da tanınmış məşqçiyə çevirdi.
2022-ci ildə isə Türkiyənin Fənərbaxça klubunun baş məşqçisi olan Jesus, bu komandaya Türkiyə Kubokunu qazandıraraq uğurlu mövsüm keçirdi. Ardınca yenidən Əl-Hilal klubuna qayıdan məşqçi, indi isə Ronaldunun şərəfini qoruduğu Əl-Nəsrdə yeni səhifə açır.
