BAKI, AzerVoice — Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti (XRİTDX) tərəfindən informasiya təhlükəsizliyi sahəsində çalışan insan resurslarının inkişafı və peşəkar bacarıqların ölçülməsi məqsədilə İnsan Resurslarının İntellektual Qiymətləndirmə Sistemi istifadəyə verilib.

AzerVoice xəbər verir ki, bu barədə məlumatı Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti yayıb.

Rəqəmsal qiymətləndirmə və kadr hazırlığı

Yeni sistem dövlət qurumlarında informasiya təhlükəsizliyi və texnologiyaları istiqamətində fəaliyyət göstərən əməkdaşların peşəkar hazırlıq səviyyələrinin və funksional bacarıqlarının müasir qiymətləndirmə alətləri vasitəsilə yoxlanılmasını təmin edir. Qiymətləndirmə nəticələrinə əsasən, mütəxəssislərin səriştə səviyyələrinin yüksəldilməsi üçün uyğun təlimlər keçirilərək onlara sertifikatların təqdim olunması nəzərdə tutulur.

İlqar Musayev: "Məqsəd səriştə boşluqlarının identifikasiyasıdır"

Sistemin təqdimatında iştirak edən XRİTDX rəisi general-leytenant İlqar Musayev platformanın funksional imkanları ilə tanış olub. Xidmət rəisi bildirib ki, təşəbbüsün əsas məqsədi qiymətləndirmə proseslərini yalnız rəqəmsal müstəviyə keçirmək deyil, kadrların peşəkar səviyyəsinin obyektiv meyarlarla müəyyən edilməsi və inkişaf proseslərinin planlı idarə olunmasıdır. O vurgulayıb ki, sistem sahə üzrə vahid yanaşmanın formalaşmasına və peşəkar intizamın gücləndirilməsinə mühüm töhfə verir.

Şəffaflıq və hədəfli təlim proqramları

Sistem qiymətləndirmə mexanizmlərinin vahid standartlar əsasında tənzimlənməsini, proseslərdə şəffaflığın və hesabatlılığın artırılmasını təmin edən kompleks platforma kimi fəaliyyət göstərir. Bu çərçivədə, aparılan qiymətləndirmə nəticələrinə əsasən, mütəxəssislərin nəzəri və praktiki biliklərinin inkişafı üçün XRİTDX tərəfindən hədəfli təlim proqramları həyata keçirilir.

İlk mərhələdə Energetika Nazirliyi və SOMDA əməkdaşları iştirak edir

İlkin mərhələdə Energetika Nazirliyi və Strateji Obyektlərin Mühafizəsi Dövlət Agentliyinin müraciətləri əsasında həmin qurumların İT əməkdaşlarının bilik səviyyələri qiymətləndirilib. Hazırda XRİTDX tərəfindən sözügedən əməkdaşlar üçün Bakı Ali Neft Məktəbində yeni istifadəyə verilmiş “İnformasiya Təhlükəsizliyi Testləri” laboratoriyasında ikihəftəlik təlim proqramlarına başlanılıb.