BAKI, AzerVoice

"BP-Azerbaijan" şirkəti 2025-ci il ərzində "Şahdəniz" yatağı üzrə hasilat göstəricilərini rəsmən açıqlayıb.

AzerVoice xəbər verir ki, hesabat ilində yataqdan ümumilikdə 27 milyard kubmetr qaz hasil edilib.

Qeyd edək ki, 2024-cü ildə yataqdan 28 milyard kubmetr qaz hasil edilmişdi. Beləliklə, 2025-ci ildə qaz hasilatında ötən illə müqayisədə 3,6% azalma qeydə alınıb. Buna baxmayaraq, kondensat hasilatı sabitliyini qoruyub. Hesabat dövründə yataqdan təxminən 4 milyon ton (təxminən 32 milyon barel) kondensat çıxarılıb ki, bu da 2024-cü ilin göstəriciləri ilə eynidir.

Şirkətin məlumatında vurğulanır ki, hazırda "Şahdəniz" yatağının hasilat gücü gündəlik təxminən 77 milyon kubmetr, illik isə təxminən 28 milyard kubmetr təşkil edir. Bu potensial yatağın həm daxili bazarın təminatında, həm də beynəlxalq ixrac öhdəliklərinin yerinə yetirilməsində əsas rolunu qoruyur.

i
"Şahdəniz" yatağının işlənməsi üzrə müqavilə 4 iyun 1996-cı ildə imzalanıb. Hazırda layihədə tərəflərin iştirak payları aşağıdakı kimidir:

BP (operator) – 29,99 %

LUKOİL – 19,99 %

TPAO – 19 %

"Cənub Qaz Dəhlizi" QSC – 16,02 %

NICO – 10 %

MVM – 5 %