BAKI,AzerVoice
Quba İş Adamlarına Dəstək-QİAD platformasının 1 illik fəaliyyətinin təqdimat edilməsi məqsədilə "QİAD üzvləri ilə görüş" proqramı təşkil edilmişdir.
AzerVoice xəbər verir ki, tədbirdə QİAD İdarə Heyətinin sədri Cabbar Heybətov və üzvləri, Quba Rayon İcra Hakimiyyətinin Şöbə müdirinin müavini Loğman Əliyev, Quba-Xaçmaz Regional Məşğulluq filialının müdir müavini Rasim Məmmədov, Quba Rayon Əmək Müfəttişliyinin rəisi Təngiz Nəzərov, Quba Regional Turizm İdarəsinin nümayəndəsi Rəfail İskəndərov, Quba Regional Təlim Mərkəzinin direktoru İslam Bəyəhmədov, Quba Peşə liseyinin direktoru Hüseynağa Baxışov və Quba rayonun bank filiallarının rəhbərləri və media nümayəndələri iştirak etmişdir.
Tədbir Azərbaycan Respublikasının Dövlət Himni və 44 günlük Vətən Müharibəsində canından keçən qəhrəman şəhidlərimizin əziz xatirəsini bir dəqiqəlik sükutla yad edilməsi ilə açıq elan edilmişdir. QİAD platformasının "2024-2025-ci il fəaliyyət hesabatı"nın təqdimatı edilmişdir. QİAD İdarə Heyətinin sədri Cabbar Heybətov çıxış edərək bildirmişdir: "Bu gün burada sadəcə bir təşkilatın deyil, Quba iş adamlarının bir birliyə çevrilməsinin, səmimi ab-havada əməkdaşlığının, ən əsası bir il öncə atılan addımın bu gün 50 nəfərlik iş insanından ibarət bir ailəyə çevrildiyini görəndə qürurlandığımız gündür. QİAD kağız üzərində bir ad olaraq qalmadı, arxasında onlarla əmək, fikir, əzmkarlıq və əməkdaşlıq dayandı. 1 il ərzində keçirdiyimiz seminarlar, təlimlər, görüşlər və toplantılar yalnız bu məqsədi daşıdı. Turizmdən aqrar sektora, ənənəvi ticarətdən innovativ fikirlərə qədər müxtəlif sahələrdən onlarla iş adamını bir yerə topladıq. Bu gün təkcə 1 ili qeyd etmirik, həm də gələcək illərin qapısını açırıq".
Quba Rayon İcra Hakimiyyətinin Şöbə müdirinin müavini Loğman Əliyev çıxış etmiş, QİAD-ın bundan sonrakı fəaliyyətində uğurlar arzulamışdır.
Tədbir çay süfrəsi arxasında səmimi atmosferdə söhbətlərlə davam etmişdir. Sonda QİAD üzvlərinə "Üzvlük Sertifikatı" təqdim olunmuşdur.
