BAKI, AzerVoice, Nailə Babazadə

MÜSİAD-ın təsis olunmasının 35 illik yubileyi münasibətilə təşkil olunan futbol üzrə final mərhələsi AZFAR GROUP stadionunda baş tutub. Təhsil və Mədəniyyət Komissiyasının təşkilatçılığı, “Setkaya MMC” və “Life Sport”un baş sponsorluğu, eləcə də İnam Sport və Bakı Nitq Mərkəzinin sponsorluğu ilə keçirilən yarışmada MÜSİAD Azərbaycan üzvləri mübarizə aparıblar.

Turnirin finalında “Xəzri Tn” komandası “Hazel” üzərində 3:2 hesabı ilə qalib gələrək birinci yeri tutub. III yer isə “HEDEF GROUP” komandası olub. Onlar yarımfinalda “AVİS” komandasını 4:3 hesabı ilə məğlub edərək üçüncü pilləni təmin ediblər.

Finaldan sonra keçirilən mükafatlandırma mərasimində qaliblərə mükafatları təqdim olunub. Birinci yerə layiq görülən “Xəzri Tn” komandasına mükafat MÜSİAD Azərbaycan İdarə Heyətinin rəhbəri Rəşad Cabirli tərəfindən təqdim edilib. Rəşad Cabirli çıxışında oyunların maraqlı keçdiyini vurğulayaraq, komandaların iştirakına təşəkkürünü bildirib və hər kəsi təbrik edib.

Təqdimat mərasimində baş sponsorlar – “Life Sport” MMC-nin direktoru Qurbanəli Əliyev, “Setkaya” MMC-nin direktoru Serdar Veysel Kaya və MÜSİAD Azərbaycan Təhsil və Mədəniyyət Komissiyasının sədri Elvin Əliyev də çıxış edərək, iştirakçı komandaları təbrik edib və gələcək yarışlar üçün uğurlar arzulayıblar.