Bakı. AzerVoice:
“Damla” aztəminatlı ailələrə qayğı İctimai Birliyi öz xeyriyyəçilik fəaliyyətlərini davam etdirir.
AzerVoice xəbər veriri ki, “Damla” İB may ayında Sosial dəstək layihləri çərçivəsində Zaqatala, Şabran, Xaçmaz, Quba, Şəki, Siyəzən və Şamaxı rayonları üzrə qeydiyyatda olan toplam 48 ehtiyaclı ailəyə sosial yardım göstərilmiş, geyimlər paylanılmiş və ianəçilər tərəfindən əmanət olunan zəkatlar (pul yardımı) sahiblərinə çatdırılmışdır.
Qeyd edək ki, birlik hər il müxtəlif rayonlar üzrə aztəminatlı və Şəhid ailələrinin uşaqları üçün xeyriyyə tədbiri təşkil etməklə yanaşı universitet tələbələri üçün təcrübə imkanları da təqdim edir.
Onu da əlavə edək ki, Azərbaycanda Amerika Ticarət Palatası (AmCham) tərəfindən 2015-ci ildə Korporativ Sosial Məsuliyyət (KSM) sahəsində keçirilən müsabiqə çərçivəsində “Damla”İB-nin tənha qocaların və əlilliyi olan insanların ərzaq yardımı ilə təmin edilməsi layihəsi müxtəlif nominasiyalarda “Gümüş mükafat”a layiq görülüb.
Qeyd edək ki, “Damla”İB xeyriyyə qurumu olaraq – aztəminatlı ailələrə, valideyn himayəsindən qismən və ya tamamən məhrum uşaqlara, fiziki əngəlli insanlara və tənha yaşayan ehtiyaclı durumda ahıllara, imkansız tələbə gənclərə və təbii fəlakətlər nəticəsində yardıma möhtac əhaliyə, əməliyyat və müalicə üçün maddi dəstəyə ehtiyaclı soydaşlarımıza ünvanlı yardımların göstərilməsi məqsədilə yaradılmışdır. 2008-ci ildə könüllü yardımsevərlərin təklif və işgüzarlığı ilə kiçik yardım aksiyaları olaraq başlayan fəaliyyət 2010-cu ildə QHT olaraq Azərbaycan Dövlət Ədliyyə Nazirliyinin rəsmi qeydiyyatına alınmıştır.
İctimai birlik ərzaq, sosial (geyim və məişət avadanlığı, odun ehtiyacı və s), tibbi və təhsil yardımları ilə yanaşı mənəvi-psixoloji dəstək, təmir-tikinti işlərində yardım kimi böyük əhatli xidmətlər göstərməkdədir.
Birliyin nəznində beş şöbə fəaliyyət göstərir. Onlara dizayn və informasiya şöbəsi, ictimai əlaqələr şöbəsi, valideyn himayəsindən məhrum uşaqlarla iş şöbəsi, aztəminatlı ailələrlə iş şöbəsi və könüllülərlə iş şöbəsi daxildir.
