BAKI,
AzerVoice
“Sərvətimin böyük hissəsini Afrikada səhiyyə və təhsilə sərf
edəcəyəm.”
AzerVoice xəbər verir ki, amerikalı
milyarder və “Microsoft”un qurucusu Bill Qeyts qarşıdakı 20 ildə
sərvətinin əsas hissəsini Afrikada səhiyyə və təhsilin inkişafına
yönəltməyə söz verib.
69 yaşlı Qeyts bildirib ki, "səhiyyə və təhsil vasitəsilə insan potensialını üzə çıxarmaqla, Afrikadakı hər bir ölkə çiçəklənmə yolunda olacaq". O, afrikalı gəncləri süni intellektin səhiyyədə istifadəsi istiqamətində innovativ yollar axtarmağa çağırıb.
Qeyts ötən ay sərvətinin 99 faizini 2045-ci ilə qədər, yəni fondunun bağlanacağı tarixədək ianə etməyi planlaşdırdığını açıqlayıb. Onun sözlərinə görə, bu maliyyənin böyük hissəsi Afrika ölkələrində sağlamlıq və təhsil problemlərinin həllinə yönəldiləcək.
Mozambikin keçmiş birinci xanımı Qraça Maşel də Qeytsin açıqlamasını alqışlayaraq, bunu “kritik bir anda atılmış mühüm addım” kimi dəyərləndirib.
Qeyd edək ki, ABŞ prezidenti Donald Trampın “Amerika birinci yerdədir” siyasəti çərçivəsində Afrikaya ayrılan bir sıra səhiyyə yardımları, o cümlədən HİV/QİÇS proqramları azaldılmışdı ki, bu da qitədə səhiyyənin gələcəyi ilə bağlı narahatlıqlara səbəb olmuşdu.
Bill Qeyts vurğulayıb ki, fondun əsas prioritetləri ilkin tibbi xidmətlərin gücləndirilməsi, ana və körpə ölümlərinin azaldılması, ölümcül yoluxucu xəstəliklərə qarşı mübarizə və yoxsulluqdan xilas üçün davamlı təşəbbüslərin dəstəklənməsidir.
