BAKI, AzerVoice, Nailə Babazadə

İran Parlamenti Asiya Parlament Assambleyasının (APA) Siyasi İşlər Daimi Komitəsi və Fələstin Komitəsinin toplantılarına müqəddəs Məşhəd şəhərində ev sahibliyi edəcək.

AzerVoice xəbər verir ki, iki APA komitəsinin görüşləri dekabrın 3-dən 6-dək İranın şimal-şərqində yerləşən Məşhəd şəhərində keçiriləcək.

Tədbir çərçivəsində Asiyanın müxtəlif ölkələrindən 15 parlament nümayəndə heyəti bir araya gələrək əməkdaşlıq təşəbbüsləri və Fələstin də daxil olmaqla əsas siyasi məsələlər üzrə müzakirələr aparacaq.

İranlı deputatın Tasnim agentliyinə verdiyi məlumata görə, Məşhəddə keçiriləcək görüşlərdə iştirakçılar yeddi fərqli mövzuda qətnamə layihələrini təsdiqləməsi gözlənilir. Bunlar arasında Asiya ölkələri arasında çoxtərəfli əməkdaşlığın təşviqi, qanunvericilik fəaliyyətlərinin gücləndirilməsi və yaxşı idarəçilik məsələləri yer alır.

APA-nın Fələstin Komitəsi eyni zamanda Asiya parlamentlərinin Fələstin məsələsinə dair dəyişməz dəstəyini bir daha təsdiqləyəcək.

Qeyd edək ki, Asiya Parlament Assambleyası 2006-cı ildə 1999-cu ildə təsis edilmiş Asiya Parlamentləri Sülh Assosiasiyasının (AAPP) 7-ci sessiyasında yaradılıb.