BAKI, AzerVoice, Nailə Babazadə

Əfqanıstan mətbuatının məlumatına görə, Pakistanla sərhəddə baş verən toqquşmalardan sonra elan edilən atəşkəsin təfərrüatlarını müzakirə etmək üçün İstanbulda keçirilən görüşdə tərəflər bir çox məsələdə razılığa gəlib, digər məsələlər üzrə danışıqların davam edəcəyi bildirilib.

AzerVoice xəbər verir ki, Əfqanıstanın paytaxtı Kabildə yerləşən Tolo News telekanalının verdiyi xəbərə əsasən, ABŞ-ın X sosial media platformasında yayımlanan məlumata görə, adları açıqlanmayan mənbələr danışıqların gedişatı barədə məlumat paylaşıb.

Mənbələrin bildirdiyinə görə, Əfqanıstan və Pakistan nümayəndə heyətləri İstanbul görüşündə bir çox məsələdə anlaşma əldə edib, qalan məsələlərin isə gün sonuna qədər dəqiqləşdirilməsi gözlənilir.

Mənbələr danışıqların gecə saatlarınadək davam edə biləcəyini, yekunda isə tərəflərin ortaq bəyanat yayımlayacağını vurğulayıblar. Bəyanatda atəşkəsin uzadılması, sərhəd yollarının yenidən açılması, əsirlərin azad edilməsi və növbəti görüşün yeri ilə vaxtının müəyyənləşdirilməsi kimi məsələlərin yer alacağı qeyd edilib.

Qeyd edək ki, iki ölkə arasında baş verən sərhəd toqquşmalarının ardından 15 oktyabrda elan edilən 48 saatlıq atəşkəs, Türkiyə və Qətərin vasitəçiliyi ilə Doha şəhərində keçirilən danışıqların sonuna qədər uzadılmışdı.

Doha görüşlərində Türkiyə Prezidenti Rəcəb Tayyib Ərdoğanın tapşırığı ilə Milli Kəşfiyyat Təşkilatının (MİT) rəhbəri İbrahim Kalın da iştirak etmişdi.

Əsas müzakirə mövzusu “mövcud atəşkəsin uzadılması və sərhəd toqquşmalarının həlli” olmuş, nəticədə tərəflər razılıq əldə etmişdilər.

Doha-da 14 saat davam edən danışıqlardan sonra atəşkəsin detallarını işləmək üçün texniki komitənin ilk iclasının İstanbulda keçirilməsi qərara alınmışdı.

Pakistan mətbuatının yazdığına görə, Pakistan və Əfqanıstan nümayəndə heyətləri bu məqsədlə 25 oktyabrda İstanbulda bir araya gəliblər.