BAKI, AzerVoice, Nailə Babazadə
Birləşmiş Millətlər Təşkilatının Qaçqınlar üzrə Ali Komissarlığının (BMMYK) sözçüsü Babar Baloch, Əfqanıstanda baş verən dağıdıcı zəlzələdən sonra insani yardım imkanlarının tükəndiyini bildirib və beynəlxalq ictimaiyyəti təcili dəstəyə çağırıb.
AzerVoice xəbər verir ki,Cenevrədə keçirilən həftəlik BMT mətbuat konfransında çıxış edən Baloch bildirib ki, 31 avqust tarixində Əfqanıstanda baş verən zəlzələdə min nəfərdən çox insan həlak olub, minlərlə insan yaralanıb və BMMYK zərər çəkmiş ərazilərə yardım üçün bütün mövcud resurslarını səfərbər edib.
“Bəzi kəndlər tamamilə yerlə bir olub. Şərqi Əfqanıstan zəlzələdən ən çox zərər görən bölgədir. Sağ qalan insanlar evlərinin uçduğunu görüb və gecəni çöldə keçirməyə məcbur olublar,” – deyə Baloch bildirib.
Zəlzələdən sonra yolların dağıldığını, bir çox insanın hələ də dağıntılar altında qaldığından narahat olduqlarını bildirən Baloch, itkilərin artmasından ehtiyat etdiklərini də əlavə edib.
Baloch əlavə edib ki, zəlzələ ilə yanaşı, ölkə həm də şiddətli quraqlıq və qonşu ölkələrdən geri dönən milyonlarla miqrantın yaratdığı təzyiqlərlə qarşı-qarşıyadır, “Əfqanıstan bu il ərzində 2,5 milyondan çox miqrantı cəmiyyətə inteqrasiya etməyə çalışır. Apreldən bu yana yalnız Pakistandan 478 mindən çox əfqan geri dönüb. Onlardan 337 mini zəlzələnin episentrinə yaxın olan Torkham sərhəd qapısından keçib. Onların təxminən 24 faizi ən çox zərər çəkmiş əyalətlərdən biri olan Nangarhar ərazisinə yerləşdirilib.”
Zəlzələdən zərər çəkənlərin tibbi və psixoloji yardım ehtiyacının çox yüksək olduğunu bildirən Baloch, səhiyyə sisteminin vəziyyətə cavab verməkdə çətinlik çəkdiyini qeyd edib.
Qeyd edək ki, Əfqanıstan Qızıl Aypara Cəmiyyəti zəlzələdə min 124 nəfərin öldüyünü, 3 min 251 nəfərin isə yaralandığını bildirib.
ABŞ Geoloji Araşdırmalar Mərkəzinin (USGS) məlumatına görə, zəlzələnin episentri Pakistan sərhədi yaxınlığındakı Cəlalabad şəhərinin 27 kilometr şimal-şərqində, yerin 8 kilometr dərinliyində yerləşib və maqnitudası 6 olub.
Yerli hakimiyyət orqanları bu zəlzələni Əfqanıstanı vuran ən dağıdıcı təbii fəlakətlərdən biri kimi qiymətləndirib.
BMT-nin Humanitar Əlaqələndirmə Ofisi (OCHA) ilkin mərhələdə 12 min insanın birbaşa zərər çəkdiyini açıqlayıb.
