BAKI, AzerVoice

Qəzza ilə bağlı razılaşmanı gələn həftə əldə edə bilərik.

AzerVoice xəbər verir ki, ABŞ prezidenti Donald Tramp İsrail və HƏMAS arasında Qəzza zolağında atəşkəs razılaşmasının yaxın günlərdə mümkün ola biləcəyini bildirib.

O, Merilenddə yerləşən Endryus Birgə Hərbi Bazasında jurnalistlərə açıqlamasında “Qəzza ilə bağlı danışırıq və ümid edirik ki, gələn həftə bunu düzəldəcəyik”, – deyə qeyd edib.

Qeyd edək ki, Tramp daha əvvəl Qətər və Misirin vasitəçiliyi ilə HƏMAS-a təqdim olunan təklifi İsrailin qəbul etdiyini açıqlamışdı. HƏMAS isə razılaşma təklifinə müsbət cavab verərək, girov mübadiləsi və atəşkəsin həyata keçirilməsi üçün danışıqları davam etdirməyə hazır olduğunu bəyan edib.

Dohada aparılan son müzakirələrdə 60 günlük müvəqqəti atəşkəs, 10 diri və 18 ölü israilli girovun qaytarılması və daimi atəşkəsin əsas şərtləri müzakirə olunub. Lakin tərəflər arasında hələ də tam razılıq əldə olunmayıb.

Əsas mübahisə doğuran məqam İsrailin Qəzzanın sərhəd zonasında təhlükəsizlik buferi yaratmaqda israrlı olmasıdır. İsrail tərəfi, eyni zamanda, Rəfah bölgəsində hərbi mövcudluğunu qoruyacağını və “toplama düşərgəsi” yaradacağını açıqlayıb.