BAKI, AzerVoice

Nvidia Apple və Microsoft-u geridə qoyaraq 4 trilyon dollar dəyəri keçən ilk şirkət olub.

AzerVoice xəbər verir ki, ABŞ-ın çip nəhəngi Nvidia, səhmlərinin yüksəlişi ilə bazar dəyərini 4 trilyon dollara çatdıraraq Apple və Microsoft kimi texnologiya nəhənglərini geridə qoyub və bu səviyyəyə çatan ilk açıq şirkət olub.

Bu yüksəliş süni intellekt sahəsində artan tələbatla əlaqələndirilir.

Səhmləri gün ərzində 2,76% artaraq rekord həddə çatan Nvidia günü 1,8% yüksəlişlə başa vurub. Şirkət AI çipləri sahəsində bazarın lideri olaraq Microsoft, Google və Amazon kimi texnoloji devlərə mühüm infrastruktur təmin edir.

Qeyd edək ki, son aylarda Nvidia ilə Microsoft birinci yer uğrunda rəqabət aparırdı. Apple isə Donald Trampın tarif siyasətləri səbəbilə dəyər itirib. Nvidia isə 2024-cü ilin sonlarından etibarən bərpa olunaraq səhmlərinin dəyərini 74% artırıb.

Nvidia-nın baş direktoru Jensen Huang qlobal texnologiya səhnəsində yeni lider fiqur kimi tanınır. Onun şəxsi sərvəti 140 milyard dollara yaxınlaşaraq dünyanın ən zəngin insanları arasına daxil olub.

Şirkətin Project Stargate kimi nəhəng beynəlxalq AI layihələrində əsas tərəfdaş olması, onun strateji rolunu daha da artırır. Analitiklər Nvidia-nın 2028-ci ilə qədər 6 trilyon dollara çata biləcəyini bildirirlər.