BAKI, AzerVoice

Elon Maskdan “Amerika Partiyası” sorğusu - ABŞ-da siyasi böhran müzakirəsi alovlanır.

AzerVoice xəbər verir ki, Tesla və SpaceX şirkətlərinin sahibi İlon Mask ABŞ-da yeni siyasi partiya yaratmaqla bağlı təşəbbüsünü yenidən gündəmə gətirib.

O, ABŞ-ın Müstəqillik Günü münasibətilə “X” sosial media platformasında keçirdiyi sorğuda ictimai rəyin nəbzini yoxlayıb.

Mask sorğuda “Amerika Partiyasını yaratmalıyıqmı?” sualını ünvanlayıb. Təxminən 240 min iştirakçının qatıldığı sorğunun nəticələrinə görə, 62% “bəli”, 38% isə “yox” cavabı verib. Mask bu nəticəyə cavab olaraq “İnsanlar danışdı. ABŞ-da orta 80 faizi təmsil edəcək yeni siyasi partiyaya ehtiyac var. Bu, qismətdir”- sözlərini işlədib.

Milyarder iş adamı, ABŞ prezidenti Donald Trampla vergi siyasəti məsələsində fikir ayrılığına düşdükdən sonra iyunun əvvəlində “Amerika Partiyası” ideyasını ilk dəfə ortaya atmışdı. Mask, Trampın dəstəklədiyi yeni vergi endirimi qanun layihəsini də sərt şəkildə tənqid edib.

Siyasi müşahidəçilər Maskın bu addımını ABŞ-da ikipartiyalı sistemə alternativ yaratmaq cəhdi kimi qiymətləndirir və yeni partiya təşəbbüsünün ölkədə siyasi balansı dəyişdirə biləcəyini bildirirlər.

Qeyd edək ki, Elon Maskın “X” platformasında tez-tez keçirdiyi sorğular ictimai və siyasi debatlara səbəb olur və onun qərarlarının formalaşmasında rol oynayır.