BAKI,
AzerVoice
İsrail Azadlıq Donanmasının Qəzzaya yardım missiyasını dayandırmaq
qərarına gəlib.
AzerVoice xəbər verir ki, İsrail təhlükəsizlik qüvvələri İtaliyadan yola düşərək Qəzzaya humanitar yardım aparan "Madleen" gəmisinin blokadanı yararaq bölgəyə daxil olmasının qarşısını almaq niyyətindədir.
İsrailin dövlət televiziyası KAN-ın yaydığı məlumata görə, Qəzzaya iyunun 7-də çatacağı gözlənilən və Azadlıq Donanması Koalisiyasına məxsus olan gəmi İsrail tərəfindən izlənilir. Gəminin İsrail dəniz qüvvələri tərəfindən saxlanılması və ya ələ keçirilməsi ehtimalı da gündəmdədir.
Adı açıqlanmayan İsrail hərbi mənbələri yerli mediaya
bildiriblər ki, gəmi ekipajına “məhdud dəniz zonasına” daxil
olmamaqla bağlı xəbərdarlıq ediləcək. Əgər xəbərdarlığa əməl
olunmazsa, İsrail qüvvələrinin müdaxilə edəcəyi istisna
edilmir.
Gəmidə olan Avropa Parlamentinin üzvü Rima Həsən bildirib ki, bu
missiyanın uğur qazanması üçün ictimaiyyətin və medianın dəstəyi
əsas şərtdir. “Keçmişdəki yardım missiyalarında mediadan gizli
hərəkət strategiyası uğursuz oldu. Bu dəfə açıq və intensiv əlaqə
qurmalıyıq.” - deyə o bildirib.
Qeyd edək ki, gəmidə Rima Həsənlə yanaşı İsveçli iqlim fəalı Qreta Tunberq və "Taxt Oyunları" serialının aktyoru Liam Kanninqem də iştirak edir.
Gəminin ekipajı arasında olan türkiyəli fəal Şuayb Ordu sosial şəbəkədə yayımladığı videoda vəziyyətlərinin yaxşı olduğunu bildirib və beynəlxalq ictimaiyyəti diqqət göstərməyə çağırıb. “Hələ də irəliləyirik, bizi unutmayın!” - deyə o vurğulayıb.
Qeyd edək ki, Azadlıq Donanması daha əvvəl də Qəzzaya humanitar yardım aparmağa çalışmış, lakin bu təşəbbüslər İsrail tərəfindən blokadaya alınmışdı. Beynəlxalq ictimaiyyət bu tip təşəbbüsləri dəstəkləsə də, İsrailin təhlükəsizlik arqumentləri regionda gərginliyin artmasına səbəb olur.
