BAKI, AzerVoice, Nərmin Ağayeva

Microsoft, İsrail ordusunun Qəzzadakı hücumlarında şirkətin texnologiyalarından istifadəsinə etiraz edən iki işçisinin – proqram mühəndisləri Riki Fameli və Anna Hatlın – işdən çıxarıldığını açıqlayıb.

AzerVoice xəbər verir ki, Microsoft-un bəyanatında, işçilərin şirkət siyasətlərini pozaraq prezident Bred Smitin ofisinə “qanunsuz” daxil olduqları bildirilib. “Apartheid üçün Azure yoxdur” qrupunun təşkil etdiyi etiraz aksiyası, Microsoft-un İsrailə təqdim etdiyi iddia olunan texnoloji dəstəyə qarşı yönəlib. Etirazçılar şirkətdən İsraillə əlaqələri kəsməyi və Fələstinlilərə təzminat ödəməsini tələb ediblər. X platformasında yayılan fikirlər, Microsoft-un bu addımının işçilərin ifadə azadlığını məhdudlaşdırdığına dair narahatlıqları əks etdirir.

Qeyd edək ki, Associated Press-in 2025-ci il araşdırması, Microsoft və OpenAI-nin süni intellekt modellərinin İsrailin Qəzza və Livandakı hərbi hədəfləri seçmək üçün istifadə edildiyini, “The Guardian” isə İsrailin Fələstinlilərin telefon zənglərini Microsoft-un Azure platformasında saxladığını ortaya qoyub. Polis etiraz zamanı 7 nəfəri, o cümlədən Microsoft-un indiki və keçmiş işçilərini saxlayıb.