BAKI, AzerVoice

Tesla və SpaceX brendləri ABŞ-da nüfuz reytinqində son sıralarda yer alıb.

AzerVoice xəbər verir ki, ABŞ-da aparılan yeni sorğu İlon Maskın rəhbərlik etdiyi Tesla və SpaceX şirkətlərinin ictimai imicində ciddi eniş yaşandığını göstərib.

“Axios Harris 100” sorğusunda Tesla 95-ci, SpaceX isə 86-cı yeri tutaraq son illərin ən zəif nəticəsini göstərib. Halbuki bu iki texnoloji nəhəng 2021-ci ildə ilk onluqda – müvafiq olaraq 8-ci və 5-ci yerdə qərarlaşmışdı.

Ekspertlər bu geriləməni İlon Maskın ABŞ prezidenti Donald Trampla yaxın əlaqələri və mübahisəli DOGE layihəsi ilə əlaqələndirirlər. Həmçinin, Maskın sahibi olduğu X (əvvəlki Twitter) platforması da siyahıda yalnız bir pillə irəliləyərək 98-ci yerdə qərarlaşıb.

Sorğuya əsasən, Microsoft, Apple, Nvidia və Samsung kimi texnologiya şirkətləri ilk 10-luqda yer alıb, bu da Maskın şirkətləri ilə aralarındakı nüfuz fərqini daha da qabardıb. Tesla və SpaceX nümayəndələri məsələ ilə bağlı heç bir rəsmi açıqlama verməyiblər.

Qeyd edək ki, İlon Mask yaxın vaxtlarda Ağ Evdəki məsləhətçi rolunu həftədə bir və ya iki günlə məhdudlaşdıracağını, siyasətə sərf etdiyi vaxtı azaldacağını bildirib. Bu bəyanat bəzi müşahidəçilər tərəfindən onun siyasi arenadan geri çəkilməsi kimi qiymətləndirilib. “Politico”nun təhlilinə görə, Tramp da artıq Maskla bağlı ictimai açıqlamalardan çəkinir və apreldən bəri onunla bağlı heç bir paylaşım etməyib.