BAKI, AzerVoice
Roma Papası Fransisk, ölümündən əvvəl, Romadakı yeniyetmələr üçün nəzərdə tutulmuş həbsxanada fəaliyyət göstərən makaron fabrikinə ipoteka borcunun ödənilməsi üçün təxminən 200 min avro bağışlayıb.
AzerVoice xəbər verir ki, bu barədə Britaniyanın "The Economist" jurnalı məlumat yayıb.
Məlumata görə, bu məbləğ pontifikin şəxsi hesabındakı demək olar ki, bütün pulları təşkil edib.
Qeyd etmək lazımdır ki, Papa Fransisk həmişə məhbuslara xüsusi həssaslıqla yanaşıb, səhv edənlərə qarşı mərhəmət göstərməyə çağırıb. O, vətəni Argentinada türmələri tez-tez ziyarət edib və Buenos Ayres arxiyepiskopu olduğu dövrdə də Pasxa öncəsi Müqəddəs Cümə axşamı günü məhkumların ayaqlarını yumaq mərasimini məhz həbsxanalarda icra edib. Papa seçildikdən sonra da bu ənənədən əl çəkməyib.
