BAKI, AzerVoice
Çinin illərlə gizlətdiyi nüvə sualtı bazası peyk görüntüləri ilə üzə çıxıb.
AzerVoice xəbər verir ki,
Google Earth-ün yaydığı son peyk şəkilləri ilə Çinin Sarı dəniz
sahilində yerləşən və uzun müddətdir gizli saxlanılan nüvə sualtı
qayığı bazası ifşa olunub.
Qingdao şəhəri yaxınlığında yerləşən “Birinci Sualtı Baza”da altı
sualtı qayığın olduğu aydın görünür. Onlardan beşi nüvə enerjisi
ilə işləyir, biri isə qurudadır.
Avstraliyalı müstəqil analitik Aleks Lakın bildirdiyinə görə, şəkillərdə iki Type 091, iki Type 093A və mənşəyi hələlik məlum olmayan bir nüvə sualtı qayığı yer alır. Həmçinin, istismardan çıxarılan və Type 094 sinfi ilə əvəzlənən yeganə Type 092 ballistik raket daşıyan sualtı qayığın görüntüsü də qeydə alınıb.
Ekspertlər bu görüntülərin Çin Xalq Azadlıq Ordusu Dəniz Qüvvələrinin (PLAN) genişlənən gücünü ortaya qoyduğunu bildirir. ABŞ Müdafiə Nazirliyinin hesabatına əsasən, PLAN-ın hazırda 60-a yaxın sualtı qayığı var. Onların sayı 2025-ci ildə 65-ə, 2035-ci ildə isə 80-ə çatacağı gözlənilir.
Qeyd edək ki, son 15 ildə Çin 12 yeni nüvə sualtı qayığı inşa edib. Bu proses Pekinin bölgədə ABŞ-ın dəniz üstünlüyünə meydan oxumaq strategiyasının mühüm hissəsidir. Google Earth-un yaydığı görüntülər isə bu modernizasiya səylərinin artıq gizli saxlanılmadığını sübut edir.
