BAKI,AzerVoice, Fərid Mikayılov

Tacikistan–Əfqanıstan sərhədində baş verən silahlı insident zamanı 4 hücumçu zərərsizləşdirilib.

AzerVoice xəbər verir ki, bu barədə Tacikistanın Sərhəd Mühafizə Qoşunları məlumat yayıb.

Rəsmi açıqlamada bildirilib ki, Əfqanıstan ərazisindən Tacikistana qanunsuz yollarla keçməyə cəhd edən silahlı şəxslərlə sərhəd təhlükəsizlik qüvvələri arasında toqquşma baş verib. Qarşıdurma nəticəsində silahlı qruplaşmanın 4 üzvü öldürülüb.

Hadisə yerində hücumçulara məxsus çoxsaylı silah və döyüş sursatı aşkar edilərək götürülüb. Sərhəd xəttində təhlükəsizliyin tam təmin edildiyi, faktla bağlı istintaqın başladıldığı qeyd olunub.

Məlumata görə, son iki ay ərzində Tacikistan–Əfqanıstan sərhədində silahlı qrupların ölkə ərazisinə sızma cəhdləri zamanı üç dəfə silahlı toqquşma qeydə alınıb.

Xatırladaq ki, 2025-ci ilin noyabrında baş verən insidentlərdə sərhəd bölgəsində fəaliyyət göstərən bir obyektə hücum nəticəsində 5 Çin vətəndaşı həlak olmuş, daha 5 nəfər yaralanmışdı. Ötən ayın sonunda isə Tacik sərhəd zastavasına edilən hücum zamanı 3 hücumçu öldürülmüş, 2 Tacik hərbçisi həyatını itirmişdi.

Tacikistan rəsmiləri Əfqanıstan hökumətini sərhəd təhlükəsizliyinin təmin olunması ilə bağlı öhdəliklərini yerinə yetirməməkdə ittiham edir.