BAKI, AzerVoice, Orxan Qədirzadə
Birləşmiş Millətlər Təşkilatı (BMT) İsrailli rəsminin “Qəzzadakı sarı xəttin yeni sərhəd olduğu” barədə açıqlamasına münasibət bildirərək, Qəzza və İsrail sərhədlərində hər hansı dəyişikliyə qarşı olduqlarını açıqlayıb.
AzerVoice xəbər verir ki, bu barədə BMT Baş katibinin sözçüsü Stefan Düjarriç gündəlik mətbuat brifinqində mövzu ilə bağlı sualı cavablandırarkən deyib.
Düjarriç bildirib ki, bu tip açıqlamalar ABŞ Prezidenti Donald Trampın təqdim etdiyi sülh planının mahiyyəti və müddəaları ilə uyğun deyil. O, BMT-də Qəzza məsələsinin müzakirəsində “sarı xətt” anlayışından deyil, mövcud Qəzza–İsrail sərhədləri çərçivəsindən istifadə olunduğunu qeyd edib.
İsrail Silahlı Qüvvələrinin Baş Qərargah rəisi Eyal Zamir bir gün əvvəl Şimali Qəzzada hərbçilərlə görüş zamanı atəşkəs çərçivəsində müəyyən edilən sarı xəttin Qəzza ilə İsrail arasında “yeni sərhəd” kimi qəbul edildiyini iddia etmiş və İsrailin hazırkı hərbi mövqelərini qoruyacağını bildirmişdi.