BAKI,AzerVoice,Fərid Mikayılov

ABŞ Prezidenti Donald Tramp və Nyu-York şəhərinin yeni seçilmiş meri Zahran Mamdani Ağ Evdə keçirdikləri ilk görüşdə mehriban münasibət sərgiləyərək şəhərdə cinayətkarlıqla mübarizə və yaşayış xərclərinin azaldılması istiqamətində əməkdaşlıq edəcəklərini bildiriblər.

AzerVoice xəbər verir ki, son aylarda bir-birilərinə qarşı kəskin ifadələr səsləndirən tərəflər görüş zamanı qarşıdurma əvəzinə qarşılıqlı anlayış nümayiş etdiriblər.

34 yaşlı Mamdani Oval ofisdə 79 yaşlı Tramp ilə yanaşı dayanarkən Prezident onu məmnuniyyətlə qarşılayıb və dövlət rəhbərinin sözlərinə görə, tərəflər “gözləniləndən daha çox məsələdə ortaq mövqe” tapıblar.

Görüşdə siyasət baxımından fərqli mövqelərə malik liderlər arasında yeni bir əməkdaşlıq münasibətinin yarandığı diqqət çəkib. `

Görüşdən əvvəl Tramp Mamdanini “radikal solçu”, “kommunist” və “antisemit” kimi ifadələrlə tənqid etmişdi. Lakin Ağ Evdə tərəflər jurnalistlərin sualları qarşısında bu ittihamları zarafatla qarşıladılar. Tramp Mamdanini “çox məntiqli insan” adlandıraraq ona yönələn islamofob sualları da rədd edib.

Görüş zamanı hər iki siyasətçi Nyu-Yorkda mənzil tikintisinin artırılması və yaşayış xərclərinin azaldılması kimi məsələlərdə əməkdaşlığa hazır olduqlarını ifadə ediblər.