BAKI, AzerVoice, Orxan Qədirzadə

ABŞ Prezidenti Donald Tramp Səudiyyə Ərəbistanının Vəliəhd Şahzadəsi Məhəmməd bin Salmanın xahişindən sonra Sudandakı müharibə ilə bağlı səylərə başlamağa hazır olduğunu bildirib.

AzerVoice xəbər verir ki, Tramp bu açıqlamanı Vaşinqtonda keçirilən Səudiyyə-ABŞ İnvestisiya Forumu zamanı səsləndirib.

“Vəliəhd Şahzadə Sudana dair güclü addım atmağımı istəyir. Bu məsələ gündəmimdə deyildi, amma bunun nə qədər vacib olduğunu görürəm və Sudan istiqamətində işləməyə başlayacağıq.”-Tramp deyib.

Tramp forumdan sonra sosial media hesabında yayımladığı açıqlamada Sudandakı vətəndaş müharibəsini “dünyanın ən şiddətli münaqişəsi və ən böyük humanitar böhranı” adlandırıb və münaqişənin həlli üçün Səudiyyə Ərəbistanı, Birləşmiş Ərəb Əmirlikləri və Misirlə əməkdaşlıq edəcəyini deyib.

Qeyd edək ki, Sudanda 2023-cü ilin aprelindən bəri ordu ilə Çevik Dəstək Qüvvələri (RSF) adlı silahlı qrup arasında davam edən münaqişə nəticəsində on minlərlə insan həlak olub, təxminən 12 milyon nəfər isə məcburi köçkünə çevrilib.