BAKI, AzerVoice, Fərid Mikayılov

ABŞ-da federal hakim Syuzen İllston prezident Donald Tramp administrasiyasının minlərlə dövlət qulluqçusunu işdən azad etmə planını müvəqqəti olaraq dayandırıb. Qərar Kaliforniya federal məhkəməsində keçirilən dinləmədən sonra elan olunub.

AzerVoice xəbər verir ki, San-Fransiskoda keçirilən iclasda İllston iki həmkarlar ittifaqının müraciətini qəbul edərək, 30-dan çox dövlət qurumunda planlaşdırılan ixtisarların məhkəmə araşdırması bitənədək dayandırılmasına qərar verib.

Hakim bildirib ki, Tramp administrasiyasının addımları qanunla ziddiyyət təşkil edir və açıq siyasi motiv daşıyır.

“Qanunların hökm sürdüyü bir ölkədə hökumət məmurlarını siyasi mənsubiyyətə görə hədəf almaq olmaz. Bu, qanuna ziddir” – deyə İllston vurğulayıb.

Ağ Ev keçən həftə açıqlamışdı ki, hökumət bağlanması (shutdown) səbəbindən dövlət strukturlarında kütləvi ixtisarlar başlayıb. Tramp, 15 gündür davam edən maliyyə böhranı dövründə “Demokrat qurumlarında” işçi sayını azaltmaqla hədələyirdi.

Hazırda 8 dövlət agentliyində 4 min 100 nəfərə işdən azad edilmə bildirişi göndərilib.

Məhkəmə iclasında Ədliyyə Nazirliyinin nümayəndəsi Elizabet Hedcəs ittihamları cavablandırmağa hazır olmadığını deyib və həmkarlar ittifaqlarının əvvəlcə federal əmək münasibətləri şurasına müraciət etməli olduqlarını bildirib.

Hakim İllston isə bu arqumenti rədd edib və hökumətin mövqeyini “zəif və qeyri-ciddi” adlandırıb.

“İşçilərin başı üzərinə baltalar enir, sizsə bunun qanuni olub-olmadığını belə izah etməyə hazır deyilsiniz” – deyə hakim sərt reaksiya verib.

ABŞ Dövlət Xidmətçiləri Federasiyası və Dövlət, Rayon və Bələdiyyə İşçiləri Federasiyası bildiriblər ki, hökumətin ixtisar qərarı maliyyə böhranı zamanı vacib olmayan xidmətlərin icrası kimi qiymətləndirilə bilməz və qanunsuzdur.

Tramp administrasiyasının təzyiqlərinə baxmayaraq, Konqresdəki respublikaçılar büdcə layihəsini qəbul edə bilməyiblər. Senatda demokratlar səhiyyə sığortası subsidiyalarının uzadılması tələbindən geri çəkilməyiblər.