BAKI, AzerVoice, Səməd Əyyubov

BMT Təhlükəsizlik Şurası İsrailin Qətərin paytaxtı Dohaya endirdiyi hava zərbələrini qınayıb və ərəb dövlətinin suverenliyinə dəstəyini vurğulayıb.

AzerVoice xəbər verir ki, bu barədə qurumun bəyanatında bildirilib.

“Təhlükəsizlik Şurasının üzvləri sentyabrın 9-da Dohaya endirilən zərbələri pisləyiblər. Onlar insan tələfatı ilə bağlı dərin təəssüflərini ifadə ediblər. Onlar BMT Nizamnaməsinin prinsiplərinə uyğun olaraq Qətərin suverenliyinə və ərazi bütövlüyünə dəstəklərini vurğulayıblar” - deyə, bəyanatda qeyd olunub.

Sənəddə Şura üzvləri gərginliyin azaldılmasının vacibliyinə diqqət çəkib və Qətərə dəstəyini vurğulayıblar.

Təhlükəsizlik Şurası əlavə edib ki, Qəzza zolağında saxlanılan girovların azad edilməsi və döyüşlərin dayandırılması prioritet olaraq qalır.

Xatırladaq ki, sentyabrın 9-da İsrail Dohada HƏMAS-ın rəhbərliyinə daxil olan şəxslərə qarşı hava zərbələri endirib. Qətər Daxili İşlər Nazirliyinin məlumatına görə, hücum nəticəsində təhlükəsizlik qüvvələrinin bir əməkdaşı həlak olub, bir neçə nəfər yaralanıb. HƏMAS hücum nəticəsində altı nəfərin, o cümlədən Qəzza zolağındakı liderlərdən Xəlil əl-Həyyanın oğlunun və Qətər təhlükəsizlik qüvvələrinin bir əməkdaşının həlak olduğunu təsdiqləyib.