BAKI, AzerVoice, Fərid Mikayılov

İraq Milli Hikmət Hərəkatının lideri Seyid Ammar əl-Həkim Tehranda İranın xarici işlər naziri Abbas Əraqçi ilə görüş keçirib.

AzerVoice xəbər verir ki, görüşdə ikitərəfli münasibətlər və regional məsələlər müzakirə olunub.

Danışıqlarda tərəflər İran-İraq əlaqələrinin hazırkı vəziyyətini dəyərləndirib və qarşılıqlı maraq doğuran sahələrdə əməkdaşlığın gücləndirilməsinin vacibliyini vurğulayıb.

Söhbətlərdə regional problemlər, xüsusilə də İsrailin işğal altındakı Fələstin torpaqlarında həyata keçirdiyi soyqırım və müharibə ritorikası əsas müzakirə mövzusu olub.

Tərəflər beynəlxalq ictimaiyyətin və region ölkələrinin fələstinlilərə dəstək göstərməsi, İsrailin cinayətlərinin dayandırılması və məsul şəxslərin cəzalandırılması üçün ciddi addımlar atılmasının zəruriliyini bəyan ediblər.

İran XİN rəhbəri Abbas Əraqçi, İsrail və ABŞ-ın İrana qarşı son təcavüzlərini xatırladaraq, bu hücumları qətiyyətlə pisləyən və həmrəylik göstərən İraq hökumətinə, xalqına, dini rəhbərlərinə və siyasi fiqurlarına təşəkkür edib. O bildirib ki, İran silahlı qüvvələrinin sərt cavabı və xalqın birliyi düşmənlərin planlarını puça çıxarıb.

Öz növbəsində Seyyid Ammar əl-Həkim, İsrailin qanunsuz hücumlarına qarşı İranın güclü müdafiəsini yüksək qiymətləndirib. O, bölgədə sülh və təhlükəsizliyi qorumaq üçün regional əməkdaşlığın və həmrəyliyin vacibliyini vurğulayıb.