BAKI, AzerVoice, Nərmin Ağayeva

Əfqanıstanın cənub-şərqində baş verən 6 bal gücündə zəlzələ çoxsaylı insan tələfatına səbəb olub və minlərlə ailəni köçkün vəziyyətinə salaraq təcili humanitar yardıma ehtiyac yaradıb.

AzerVoice xəbər verir ki, Beynəlxalq Qızıl Xaç və Qızıl Aypara Cəmiyyətləri Federasiyası (IFRC) Əfqanıstanda baş verən zəlzələ ilə bağlı yaydığı açıqlamada, Kunar, Nangarhar və Lağman əyalətlərindəki dağıdıcı zəlzələnin geniş miqyaslı ziyana səbəb olduğunu bildirib. Açıqlamada, zəlzələ nəticəsində bir çox ailənin evsiz qaldığı və təcili humanitar yardıma ehtiyac duyduğu vurğulanıb. Əfqanıstan Qızıl Ayparası fövqəladə hallar qruplarını zərər çəkmiş ərazilərə göndərərək axtarış-xilasetmə və tibbi yardım işlərinə başlayıb. Yaralılar, xüsusilə Nangarhar xəstəxanası kimi sıxlıq yaşanan tibb müəssisələrinə təxliyə edilir.

IFRC-nin bəyanatında axtarış-xilasetmə əməliyyatları, təcili tibbi yardım, qida, təmiz su və yollara çıxışın bərpası kimi ehtiyacların ən təcili olduğu qeyd edilib. Amerika Birləşmiş Ştatları Geoloji Xidməti (USGS) zəlzələnin Cəlalabaddan 27 kilometr şimal-şərqdə, 8 kilometr dərinlikdə baş verdiyini açıqlayıb. Əfqanıstanın müvəqqəti hökumətinin sözçüsü Zabihullah Mücahid isə zəlzələ nəticəsində ölənlərin sayının 800-ü, yaralıların sayının isə 2500-ü keçdiyini bildirib. Yerli hakimiyyət orqanları bu zəlzələni ölkənin son illərdəki ən güclü təbii fəlakətlərindən biri kimi qiymətləndirir.

Qeyd edək ki, Əfqanıstanın cənub-şərq əyalətləri tez-tez zəlzələlərə məruz qalır, lakin bu miqyasda dağıntı və insan tələfatı ölkənin zəif infrastrukturunu və humanitar yardım sistemini daha da çətinləşdirir.