BAKI, AzerVoice, Nərmin Ağayeva

İspaniya hökuməti daşqınlar və meşə yanğınları səbəbilə ölkənin böyük bir hissəsini fəlakət zonası elan edib.

AzerVoice xəbər verir ki, Nazirlər Şurasının qərarına əsasən, iyunun 23-dən bəri daşqınlardan, avqustun əvvəlindən isə davam edən meşə yanğınlarından zərər çəkən ərazilər rəsmi olaraq fəlakət bölgəsi kimi tanınıb. Təhsil və idman naziri, hökumət sözçüsü Pilar Alegria bildirib ki, ölkənin 17 muxtar icmasından 16-sı bu qərara daxil edilib. İspaniyada indiyədək 407 min hektardan çox ərazi yanğında məhv olub.

Daxili İşlər Naziri Fernando Qrande Marlaska meşə yanğınlarını ölkə tarixində ən böyük yanğın fəlakəti adlandıraraq, fəlakət zonası elan olunmuş ərazilərdə yaşayanların qanunvericiliyə uyğun olaraq dövlət yardımı ala biləcəklərini açıqlayıb. Nazir hazırda 15 yerdə iri miqyaslı yanğınların davam etdiyini, fövqəladə vəziyyətin isə hələ də qüvvədə olduğunu bildirib və əhalini ehtiyat tədbirlərinə əməl etməyə çağırıb.

Qeyd edək ki, İspaniya qanunvericiliyinə əsasən, fəlakət zonasında fərdlərə ilkin yaşayış yerlərinə və əsas ehtiyac mallarına dəymiş ziyana görə maliyyə dəstəyi göstərilir, yerli hakimiyyət orqanlarının çəkdiyi xərclər kompensasiya olunur, həmçinin yardımlar təqdim edən şəxslər və təşkilatlara dövlət tərəfindən dəstək verilir. Təkcə avqust ayında 370 min hektardan artıq meşə və kənd təsərrüfatı sahəsi külə dönüb.