BAKI, AzerVoice, Nərmin Ağayeva
Qəzzalı uşaqları “düşmən” adlandıran israilli siyasətçi Avstraliyaya buraxılmayıb.
AzerVoice xəbər verir ki, ifrat sağçı Dini Sionizm Partiyasının deputatı Simça Rotmanın Sidney və Melburnda keçirilməsi planlaşdırılan tədbirlərdə iştirakı üçün ölkəyə girişinə icazə verilməyib.
Avstraliyanın daxili işlər naziri Toni Börk Rotmanın viza müraciətinin rədd edildiyini təsdiqləyib. Nazir bildirib ki, siyasətçi üç il ərzində yenidən müraciət edə bilməyəcək.
“Hökumətimiz ölkəmizə gəlib ayrı-seçkilik yayanlara qarşı sərt mövqe nümayiş etdirir. Avstraliyaya nifrət və ayrı-seçkilik dilini yaymaq üçün gəlmək istəyənləri burada istəmirik”. - deyə o bildirib.
Rotman daha əvvəl verdiyi açıqlamada Qəzzadakı uşaqları “İsrailə buraxılmaması gərəkən düşmənlər” adlandıraraq, onların “qaçqın statusunda ölkəni işğal etməsinə icazə verilməməli olduğunu” bildirmişdi.
Qeyd edək ki, Avstraliya hökuməti əvvəllər də reper Kanye West, ABŞ hüquq professoru Xalid Beydoun və İsrailin keçmiş naziri Ayelet Shaked kimi şəxslərin ölkəyə girişinə qadağa qoyub.
