BAKI, AzerVoice, Nailə Babazadə
İstanbul Hava Limanı ilə Avstraliyanın Sidney Hava Limanı arasında “Qardaş Hava Limanı” sazişi imzalanıb. Bu barədə İstanbul Hava Limanının operatoru İGA məlumat yayıb.
AzerVoice xəbər verir ki, saziş çərçivəsində iki hava limanı arasında sərnişin və yük daşımalarının artırılması, hava nəqliyyatı xidmətlərinin inkişaf etdirilməsi və ortaq destinasiya tanıtımı məqsədilə strateji əməkdaşlıq qurulub.
Tərəflər rotaların inkişafı, qarşılıqlı tanıtım və məlumat mübadiləsi sahələrində birlikdə işləyəcəklər. Həmçinin illik rəhbərlik görüşləri keçiriləcək, lazım olduqda seminarlar və işçi toplantılar təşkil olunacaq. Ticarət baxımından məxfi olmayan məlumatlar və yaxşı təcrübələr qarşılıqlı şəkildə paylaşılacaq.
Protokol çərçivəsində yeni və əlavə hava xidmətlərinin təşviqi, ortaq marketinq və tanıtım fəaliyyəti ilə İstanbul və Sidney destinasiya kimi daha çox tanıdılacaq.
Bu razılaşma Türkiyənin Avstraliya qitəsi bazarındakı mövqeyini gücləndirən mühüm addım kimi qiymətləndirilir. Eyni zamanda turizm, ticarət və mədəni əlaqələrin dərinləşməsinə də töhfə verməsi gözlənilir.
Sidney Hava Limanı ilə imzalanmış bu saziş, İstanbul Hava Limanının bu il iyun ayında ABŞ-ın Çikaqo O’Hare Beynəlxalq Hava Limanı ilə imzaladığı oxşar razılaşmadan sonra bu formatda reallaşdırdığı 10-cu beynəlxalq əməkdaşlıq olub.
Qeyd edək ki, 2025-ci ilin sentyabr ayında Türkiyənin İstanbul Hava Limanına gələn sərnişinlərin sayı 2024-cü ilin eyni dövrü ilə müqayisədə 3 faiz artaraq, 62 milyon 861 min 408 nəfər olub.
Nazirlikdən verilən məlumata görə, 2025-ci ilin sentyabr ayında hava limanının daxili reyslər üzrə sərnişin daşıma 2024-cü ilin analoji dövrü ilə müqayisədə 0,2 faiz azalaraq, 13 milyon 470 min 966 nəfər, beynəlxalq reyslər üzrə isə 4 faiz artaraq 49 milyon 390 min 442 nəfər təşkil edib.
2025-ci ilin sentyabr ayında hava limanının yük daşınması 2024-cü ilin eyni dövrü ilə müqayisədə 6 faiz azalaraq 2 milyon 468 min 337 ton təşkil edib. Bununla yanaşı, 2025-ci ilin sentyabr ayında hava limanının daxili reyslər üzrə yük daşınması 2024-cü ilin eyni dövrü ilə müqayisədə 2 faiz azalaraq, 166 min 924 ton, beynəlxalq reyslər üzrə yük daşınması isə eyni dövrlə müqayisədə 6 faiz azalaraq, 2 milyon 301 min 413 ton təşkil edib.
Məlumata əsasən, hava limanından 2025-ci ilin sentyabr ayında həyata keçirilən uçuşların sayı 2024-cü ilin sentyabr ayı ilə müqayisədə 5 faiz artaraq, 410 min 571 olub. Bununla yanaşı, daxili reyslər üzrə yerinə yetirilən uçuşların sayı 4 faiz artaraq, 94 min 361, beynəlxalq reyslər üzrə isə 5 faiz artaraq 316 min 210 olub.
2025-ci ilin sentyabr ayında Türkiyənin bütün hava limanlarında sərnişin daşınması 187 milyon 284 min 23 nəfər, yük daşınması isə 3 milyon 844 min 139 ton təşkil edib.
Xatırladaq ki, 2024-cü ildə Türkiyənin bütün hava limanlarında sərnişin daşınması 220 milyon 987 min 163 nəfər, yük daşınması isə 4 milyon 941 min 729 ton təşkil edib.