BAKI, AzerVoice, Səməd Əyyubov

Rusiya və ABŞ arasında məhdud formatda aparılan danışıqlar başa çatıb.

AzerVoice xəbər verir ki, Rusiya Prezidenti Vladimir Putin və ABŞ Prezidenti Donald Tramp görüşün keçirildiyi otağı tərk ediblər.

Qeyd edək ki, liderlərin ünsiyyəti ilk olaraq qırmızı xalça üzərindəki qısa söhbətlə başlayıb və ümumilikdə üç saata yaxın davam edib. “Üçə-üç” formatında aparılan əsas görüş isə bu vaxtdan təxminən on dəqiqə az çəkib.

Kremlin yaydığı görüntülərdə Putin başda olmaqla Rusiya nümayəndə heyətinin üzvləri danışıqlar otağından çıxarkən əks olunub. Mətbuata açıqlama verməzdən əvvəl dövlət başçısı mətbuat katibi Dmitri Peskovla qısa söhbət edib.

02:18

Alyaskada Rusiya prezidenti Vladimir Putin və ABŞ prezidenti Donald Tramp danışıqlara başlayıblar.

AzerVoice-un məlumatına görə, görüş “Elmendorf-Riçardson” hərbi bazasında yerləşən xüsusi otaqda keçirilir. Məkan ənənəyə uyğun olaraq hər iki ölkənin bayraqları ilə bəzədilib.

Görüşdə dövlət başçıları ilə yanaşı, Rusiya tərəfdən prezidentin köməkçisi Yuri Uşakov və xarici işlər naziri Sergey Lavrov, ABŞ tərəfdən isə dövlət katibi Marko Rubio və prezidentin xüsusi nümayəndəsi Stiven Uitkoff iştirak edirlər.

Bundan əvvəl Ağ Evin mətbuat katibi Kerolayn Livitt bildirmişdi ki, Alyaska sammiti “üçə-üç” formatında keçiriləcək.